Shillong: U Myntri Rangbah ka jylla u Conrad K Sangma bad u symbud myntri rangbah ba peit ia ka tnad PWD u bah Prestone Tynsong ha kane ka sngi Ba ar, ki la iakynduh ia u myntri ka tnad Transport ka ri u Nitin Gadkari, ha nongbah Delhi mynta ka sngi ha kaba ki la iakren ia ka jingshna ia ki surok ha kane ka jylla.
U Nitin Gadkari myntri kam surok, U Conrad Sangma, myntri rangbah ka Jylla bad U bah Prestone Tynsong, myntri kam PWD, haba ki ia kynduh ha New Delhi, ha ka Sngi Hat Majai:CMO
Ha ka jingpyllait kyrwoh na ka ophis jong u Myntri Rangbah, la ong ba ha ka jingialang la don lang ki ophisar ka tnad NHIDCL bad ka NHAI ha kaba la rai ban pyntreikam shaid shaid ia ki surok ha Meghalaya ha kaba ka sorkar pdeng kan ai ia ka jingkyrshan kaba pura.
“Ka sorkar pdeng ka la kut jingmut ban ai ia ka jingkyrshan baroh ia ka sorkar jylla ban pynthikna ba baroh ki surok kiba dang sahteng yn lah ban pyndep ha ka por kaba biang”, la ong u Myntri Rangbah.
Ha kane ka jingialang, la iakren ruh ia ki phra tylli ki surok ba sahteng kum ka Tura – Dalu, Baghmara – Moheskola – Ranikor, NH-62 bad ka Shillong – Dawki.
“Ngi la iakren ban pynshna ia ki surok ba kongsan kiba dei ki surokbah ne National Highway bad kumjuh ban pynbujli noh da ka jingkieng dewbilat ia ki jingkieng ba shna da ki dieng ha baroh kawei ka jylla. Ka jingialang ka long kaba seisoh bha ha kaba u myntri ka tnad surok ka ri, u la pynthikna ban ai ka jingkyrshan kaba pura ban pynbha ia ki surok ha ka jylla Meghalaya”, la ong u Myntri Rangbah.
U Conrad u la iathuh ruh ba ka jingialang jong ki heh ka tnad Transport ka sorkar pdeng bad ka tnad PWD ka sorkar jylla kin shong jingialang ha Shillong ha ka 25 bad 26 tarik mynta u bnai ban bishar bniah ia ki kam ba iadei bad ki surok ban shna ha kane ka jylla.