Sha Guwahati, ia uba mynsaw bom

Shillong,17 Naiwieng:
Ia u Bisheshwar Das 45 snem uwei na ki lanot ba la mynsaw jur na ka jingjia shah kawang Petrol bomb ha bishnupur ha kane ka sngi saitjain ba la dep la pynkynriah noh sha Nemcare Hospital, Guwahati mynta ka sngi na ka bynta ka jingsumar kaba khambha. U Das, u dei u trai jong kawei ka dukan sha ha bishnupur bad u la mynsaw jur bad la kumba mar shiteng ka met jong u ka la pdung ding hadien ba u la shah ktah ha ki lai ngut ki samla kiba la wan ban dihsha na ka dukan jong u ha ka por 11 baje mynstep ha ka sngi saitjain. La phah sumar ia u sha Woodland Hospital hynrei mynta ka sngi la pynkynriah noh sha Guwahati.
Ia katei ka rai ban pynkynriah ia u Das sha Guwahati la shim da ka sorkar jylla, bad ka jinglut jing sep na ka bynta ka jingsumar ia u ruh yn tip ka sorkar jylla, ia u Das la synran lang da ar ngut ki doktor na Civil Hospital Shillong bad la pynkynriah noh ia u na Woodland Hospital ha ka por 12:30 baje janamiet mynta ka sngi hi. Ka tyllong khubor kaba la ioh lum na Woodland Hospital, la iathuh ba u Das u don ka juh ka jinglong ha ka por ba la sei ia u napoh hospital u lah ban kren ha ka por ba sei nangne’ ong ka khubor na Woodland hospital.
Ka dei ka sien kaba ar, ba kum katei ka jingjia ka la jia hadien ba ka la mih ka jingkawang Petrol bomb ha ka ba la hap ban pynkynriah sha Guwahati. Ka jingjia kaba nyngkong ka dei ia u trai ka Meghlaya Machineries u Vikash Nandwal uba la khlad noh ha Delhi. Lah ban kdew ba haduh mynta ki pulit ki dang wad ia ki runar kiba la donkti ha katei ka kam.