Tang 1000 song la lut ploin, ka mluh ha dukan heh

Shillong,15 Naiwieng:
Ka jingpur sted ka khubor hamsaia ba ka mluh kan sa kiew dor, ka la pynioh nong bad pynlah die ia ki dukan die marbam kiba die mluh ha Iewduh. Tang mynta ka sngi kawei ka dukan heh kaba don ha IewMawlong, ka la die kumba 1000 song ka mluh kata ka mut kumba 200 song ka song heh kaba don 50 kilo ka mluh. Ka Rajasthan Food Grain, ka dukan kaba don ha Them IewMawlong ka la pyni ia ki kot ki sla jong ka, ba tang mynta ka sngi ka la lah ban die mluh haduh 200 song heh ne 1000 song rit.U trai katei ka dukan u la iathuh ba ym don mluh shuh ha ka dukan jong u, bad u la die lut ha ka por mynstep ha ka dor iew kumba u ju die. Hynrei u la ong ruh ba lashai ne la shisngi ka mluh kan sa poi sha dukana jong u bad u la kyntu ia ki paidbah ba kim dei ban tieng ba ka mluh kan sa kiew dor hynrei ka mluh kan ym kiew dor bad kan long hi kumba ju die. “Ngi die ka TaTa T.700 tyngka shi song, 50 kilo” ong u trai dukan ka Rajasthan Food Grain store.
Shuh shuh u nongthoh khubor u la wan ban tohkit hapoh Khlieh iew ia ka dor mluh, la ka long ne-em kaba shisha kumba la saphriang khubor ba ki don kiba die tam, u Durga Prasad uba die ha kawei ka dukan kaba kham heh ha Iewduh u la iathuh ba ym don mluh shuh ha dukan jong u bada u la die lut tang hapoh ka 1 kynta mynta ka step. “Nga la die kumba 6 byrni ka mluh ha ka dor iew hi” ong u Durga kaba mut ba u la die kumba 300 kilo eiei. Sa uwei pat u Sahu uba don ka dukan rit ha iewduh u la iathuh ba ma u ruh kumjuh um don mluh shuh ha dukan jong u bad u la die lut plaian mynta hi ka step ha ka dor kumba ju die hi. Kitei ki nongdie mluh ki la iathuh ba kim don mluh shuh ha ki kudam jong ki ruh namar ki la die lut plain.
Haba la kylli ioh ba lehse ka don ka jingbuh rieh eiei, ioh ba ki kwah ban die dor heh, ki la ong ba kam dei ba ki buhrieh hynrei ki la die lut , ki la iathuh ruh ba don ba wat tang uwei u briew ruh u thied mluh kumba 10 song eiei.
Halor katei ka jubab jong ki u nongthohkhubor u la leit ban kylli sa na ki nongshong dukan madan ha iew kiba shong marjan bad ki dukan die mluh, ha kaba ki la iathuh ba ki la iohi da la ki jong ki khmat ba ka mluh nba ki dukan dskhar ka la lut ha ki nongthied kiba la wan ha ka por mynstep kumba 10 baje eiei, “Ki briew ki la wanrah la ki daju la jong ban kit mluh” ong iwei i kong ba die jain. La ia kren ruh bad ki nongiew kiba wan thied mluh ha kaba ma ki ruh ki la ud ia ka jingthait ban wad mluh namarba manla ki dukan kim don mluh.