Ka kashari ha Jodhpur, mynta ka sngi, ka la rai pynrem ia U Asaram Bapu(77)
, namar ba u bat bor ia kawei na ki nongbud jongu, ha U Nailar 2013. La rai pynrem ia U Bapu, da kaba un shong phatok shirta ka jingim jongu.
La pynmih ia katei ka rai, da U Madhusudhar Sharma, uba dei u nongbishar, ha ka kashari, kaba la pynlong ha Jodhpur Central Jail, ha kaba la set ia U Bapu, naduh u snem 2013. U Bapu, u don bun bah ki nongbud jongu ha Rajasthan, Gujarat bad ha Haryana.
Ha ka rai jong ka kashari mynta ka sngi, la kynnoh ia U Asaram bad saw ngut kiwei pat bad kitei ki kynthup ia ka Sanchita lane kaba la ju tip ka Shilpi, nangta U Sharad Chandra lane uba la ju tip U Sharat Chandra, U Prakash bad U Shiva ba la ju tip U Sava Ram Hethvadiya bad ia kitei la pyngngat ha ki kyndon jong ka ain POCSO, Juvenile Justice Act bad ka Indian Penal Code. Ka Shilpi bad U Sharad Chandra, kin shong phatok 20snem, katba ia U Prakash bad U Shiva la pynkut noh ia ka jingbishar pyrshah.
Kawei ka thei samla, kaba dang 16snem, ka la kynnoh ba utei u riew blei, U Asaram Bapu, ula bat bor ia ka, ha ka miet jong ka 15 bad 16tarik Nailar 2013, ha ka ashram ha Jodhpur. U Asaram, ula shah set ha ka phatok ha Jodhpur, naduh u snem 2013 bad ula pan jamin haduh 12sien kynthih, hynrei, um shym la ioh jamin satia.
Ha ka jingrai jong ka kashari, U Asaram, ula iam rangbah mynta ka sngi, ha katei ka kashari. Katei ka samla, kaba ula bat bor, ka dei ka samla, kaba dang 16snem, kaba na Shahajahanpur, kaba ha Uttar Pradesh. U Asaram, ula ju kyntait ba u bat bor ia katei ka thei samla bad kumta, u lah ban ujor pyrshah ia katei ka rai, ha kawei pat ka kashari, kaba kham heh.