Shillong,15 Naiwieng:
Ka AJYWO Central Governing Body ka kyntu jur ia u paidbah jong ka jylla Meghalaya khamtam ki nongialam Shnong ban ieng pyrshah beit ia ka Meghalaya Regulation of Landlords and Verification of Tenants Bill 2013 jong ka sorkar Meghalaya da kaba kam kane ka aiñ jong ka sorkar jylla kan ym lah ban teh lakam ia ka jingwan rung kyrthep ki barjylla (Influx) sha kane ka ri hynrei ka dei pynban ka aiñ ka ban pyntroin ia ka hok, ka bor bad ka iktiar jong ki Trai Iing Trai Khyndew bad ki Rangbah Shnong bad ka dei ka ain ka ban pynshitom pynban ia ki Nongshongwai Trai Ri Trai Muluk jong ngi.
“Ka Meghalaya Regulation of Landlords and Verification of Tenants Bill 2013 jong ka sorkar jylla kam iapher na kiwei pat ki “Aiñ iakjakor” jong ka sorkar jylla, kum ka aiñ halor ka jingthmu ban wanrah ia ka Municipality ha ha kane ka jylla jong ngi ka ba long pyrshah ia ka 6th Scheduled jong ka Consitution jong ka Ri India.” ong u Bah M H Dkhar President ka AJYWO Sengkmie.
U Bah Dkhar u la ong ba ka MRL&VT Bill -2013 jong ka sorkar jylla kam don jingiadei ei ei ruh em bad ka jingthmu ban tehlakam ia ka jingwanrung kyrthep ki mynder sha ka ne ka ri jong ngi hynrei ka dei pynban tang ka aiñ ban khring ia ki bar ri bad bar jylla ban wan rung kyrthep sha ka jylla bad ruh ka dei tang ka aiñ ban pynbunkam bad pyntroin ia ki Rangbah Shnong bad ki Trai Iing Trai Khyndew bad ruh ban pynjynjar sat sa ia ki nongshongwai trai ri trai muluk.
“Kaba ma shuh shuh ka long ba lada ki Trai Iing, Trai khyndew bad ki Nongshongwai Trai Ri Trai Muluk ki kum pynkhein ia katei ka aiñ, kin shah pynshitom da ka ba tyngeh kat kum ka section 176 bad 177 jong ka IPC, 1860 da kaba shah set phatok haduh 2 snem bad ruh kat kum kiwei kiwei de ki kyndon aiñ ki ba tyngeh. Lada ki Trai Iing bad ki Trai Khyndew, Ki Rangbah Shnong bad ki paidbah ki pdiang matlah ia katei ka aiñ, kan long thik kumba tih ‘liewlong ia lade.” ong shuh shuh u Bah Dkhar. U nongialam jong ka AJYWO u la ong ruh ba ka MRL&VT Bill -2013 kan pynbun kam artad sa ia ki pulit namar u juh u pulit u ban peit ia ka Law and Order un hap peit ruh sa ia kane ka aiñ ka bym ler ei ei ruh em.
Ka AJYWO ka kyntu jur ia ki paidbah, ki nongsynshar Shnong, Elaka bad ki Hima ban ieng ialeh pyrshah ia kane ka aiñ iakjakor, MRL&VT Bill -2013 jong ka sorkar jylla hynrei ban kyrshan ia ka ILP ka ba dei tang ma ka ka ain kaba lah ban teh lakam ia u mynder ban wan rung kyrthep sha kane ka jylla . Namar ha ka ILP, u bar jylla lane u nongwei shwa ba un wan rung sha kane ka jylla un hap ban applai shwa ia ka permit. Ha ka permit kan don ka por sah kaba thikna. Katno sngi un shnong un sah bad un leh aiu. Un hap ban leit phai noh shwa ban kut ka por ba la buh ba un leit phai bad lada u pynkheiñ ia kane, un shah pynshitom kat kum ki kyndon aiñ ki ba tyngeh” Bynrap shuh shuh u Bah M H Dkhar.
Phi don ban ong eiei?