Peitngor ki pulit man ka sngi, ia ka Kong Ampareen

Shillong, 15 Naiwieng:
Hadien ba ka ka Hynniewtrep National Liberation Council (HNLC) ka la byrngem pyrshah ia ka Myntri ka tnad kam pynroi sor ka Kong Ampareen Lyngdoh ban pynsangeh shi syndon ban leit pynpra ia ki iing ha Umsawli ne kynduh ia ka jingiap, na ka liang ki pulit ki la shim khia bha ia kane.
U SP (city) u Bah Vivek Syiem u la ong ba ki pulit ki peitngor bha man ka sngi ia kane ka jingbyrngem ka HNLC ia ka Kong Ampareen ban pynthikna ba kane ka seng lehnoh, kan nym ioh lad da lei lei ruh.
U la ong ba kum kane ka jingbyrngem la ju leh teng ka HNLC ha ki por mynshwa bad ki pulit kila long kiba la khreh ban pynthikna ban nym aili ia kum ki kam ki riew pyntriem. U la ong ba ki pulit kin leh ia la ka kamra ban pynthikna ia ka jingshngain ha ka nongbah.