Shillong:U Conrad K Sangma, myntri rangbah ka Jylla, ula leit peit ia ka surok bypass na Mawlai bad ka surokVIP, haba la synran lang da U bah Prestone Tynsong, Deputy Chief Minister, Bah PT Sawkmie MLA ka Mawlai, ha ryngkat U bah George Lyngdoh, MLA ka Umroi.
U Conrad Sangma, Bah Prestone Tynsong bad U Bah Process Sawkmie, haba leit jurip ia ka Mawlai bypass ha ka Sngi Saitjain:CMO
U myntri rangbah, ula leit jngoh ruh ia ka kad liengsuin Umroi, ha ryngkat U bah George Lyngdoh, ha kaba la don lang ki heh jong ka tnat pyniaid kali bad ki heh jong ka tnat pyniaid liengsuin jong ka Airport Authority of India.
“Ka jingtrei ia ka Mawlai bypass, ka dang iaid shakhmat bad ka jingtrei ka iaid stet ba ba kan sdang trei kam noh shen. Ngi trei tyngeh, ha ka por kaba khim shibun bad ka jingtrei ia kane ka surok, kan pyn duna ia ka jingdheng kali ha ka nongbah Shillong” ong u myntri rangbah, hadien ka jing leit jngoh ia ka Mawlai bypass. U myntri rangbah, ula leit jngoh ia ka surok VIP na Mawlai sha Umroi bad ula iakren bad ki bor trei surok, ban pynbha ia katei ka jingtrei surok.
Haba leit jngoh ia ka kad liengsuin ha Umroi, u pynpaw ia ka jing donkam ban pyniasoh ia ka Shillong bad kiwei de ki bynta jong ka Ri bad u pynsngew ba un leit sha Delhi, ha ka taiew ban wan ban iakren, na ka bynta ban pynbha ia ka leit ka wan na Shillong sha ki bynta jong ka Ri, lyngba ka kad liengsuin Umroi bad u pynpaw ba katei ka donkam bha, namar ka jingwan ka ialehkai National Games, ha ka Jylla ha u snem 2022.
“Ngi iakren ia ki lad ki lynti ban pynheh ia ki lynti iaid jong ki liengsuin, na ka bynta ban pyntreikam pura ia ka kad liengsuin ha Shillong” ong u myntri rangbah.