Shillong: Ka Langsning FC ka la shah rem kyndit ha ka Chennaiyin FC ha ka jingiakhun ha ka lympung Second Division League kaba long ha kane ka sngi Saitjain ha Group C ha madan SSN College ha Chennai.
U nongialehkai ka Chennaiyin u Bedashwor Singh u la thep ia kane kawei ka kol ka jingjop ha ka 68 minit.
Ha kane ka jingialehkai, na ka liang ka kynhun ka Langsning ka la bujli ar ngut ki nongialehkai ba kynthup u Donlad Diengdoh bad u LancineToure ha jaka u Sameer Pradhan bad u Ryoga Katsurashima.
Ha ka jingshisha, ka Langsning kala jop ia ka Chennaiyin ha ka jingialehkai ha la iing ha u bnai ba la dep.
Kane ka jingjop, ka pyllong ia ka Chennaiyin ban khur lai point na ki 6 tylli ki jingialehkai haduh mynta.
Ha kiwei ki jingialehkai ha kane ka sngi, ka Imphal TRAU FC ka la shah rem ha ka Bengaluru FC reserves da 2-1 ba long ha Imphal, katba ka Jamshedpur FC ka iakhaid bad ka Mohammedan mar 1-1 ba long ha Jamshedpur.
Ka Mohammedan mynta ka kamai 9 point, kumjuh kum ka Langsning hynrei ka kham kiew kyrdan namar ba ka don jingiapher ha ki kol bad ka Langsning ka donkam ban lehkai bha nangne shakhmat lada ka angnud shisha ban ioh rung sha ka phainal jong kane ka lympung.
Ka Langsning kan hap ban leit sha Bangalore ban iakhun ia ka Bengaluru reserves ha ka 25 tarik mynta u bnai.