Ka MDC, kum MLA Constituency

Shillong, 15 Naiwieng:
Ka Western Youth Welfare Organisation (WY WO) Mawthadraishan circle ka la kyrshan ia ka jingthmu phiah constituency ka KHADC bad ka sngew dei ba ka elekshon ban wan,dei ban pynlong kumba long ka MLA constituency. Haba pynlait khubor hynne ka sngi, u president ka WYWO Mawthadraishan circle u Bah J Jarain u la ong ba ka West Khasi ka don 8 ngut ki MDC bad ki paidbah ka Mawthadraishan ki kwah ba kane ka elekshon dei ban pynlong kumba long ha ka MLA constituency.
“Ka Election Commission ka India ka la iaid da kaba thymmai ha ka MLA constituency, kan long ruh kaba biang eh ban pynlong elekshon MDC kumba long MLA constituency”, la ong u Bah Jarain.
Bun ki shnong kiba don mynta, ki hap ha Mawthadraishan constituency ka MLA, ki hap sha Pariong constituency ha ka MDC bad ki don kiba leit sha Mairang bad ki don kiba wan ruh bad kane ka la long kulmar bha ia ki paidbah.
Ka MDC constituency kaba rim ka don bun ki shnong kiba sngew kulmar namar ba don kiba ngat shawei ha ka MLA constituency bad don kiba ngat shawei pat ha ka MDC constituency.
Lah ban kdew ba ka KHADC ka dang pynkhreh shaid shaid ban phiah ia ki constituency kumba long ka MLA constituency, bad ka la buh thong ba kan pynlong kam shwa ban wan ka elekshon lashem snem.