Shillong: Ka Langsning FC kan iakhun biang lashai ka sngi pyrshah ia ka Chennaiyin FC ha ka Second Division League ha ka Group C ha Chennai ha ka por 4:00 pm.
Ka Langsning ka la iakhun hynriew tylli ki jingialehkai haduh mynta ha kane ka lympung nalor ki jingialehkai ha la ing bad shabar na la iing.
Ka Langsning ka dang iakhaid point bad ka Mohammedan bad ka donkam bha ban khur lai point lashai ka sngi pyrshah ia kane ka kynhun ka ISL ka Chennaiyin.
Ka Chennaiyin ka la shah rem baroh 6 tylli ki jingialehkai bad ha ka jingiakynduh bad ka Langsning ruh ka la shah rem da 2-1.
Wat la ka Langsning ka la don ka kabu ba kan pylliem biang lashai ia kane ka kynhun hynrei kam dei kaba suk ban shu khein sting.
“Ngi la sngewthuh ba ka Chennaiyin ka la rem baroh ki jingialehkai hynrei ka jingialehkai ha la iing kan ai mynsiem bha ia ka bad ki tip bha ia ka jinglong jingman”, la ong u coach ka Langsning u Bah Hering Shangpliang.
Ka Langsning ka la hap ban pyniahap ia ka jingkylla ka mariang, kaba jur bha ka jingshit haduh 35 degrees Celsius.