Shu byrngem u ‘Khajin’ ban pynbthei bom ha Assam

Shillong, 14 Naiwieng:
Ka la don ka jingkhih win mynhynin ka sngi ha ka jylla Assam, marsien ioh ia ka khubor lyngba ka SMS ba kan don ka jingbthei bom ha Guwahati ha ka jaka ba u Myntri Rangbah ka Assam u Tarun Gogoi u dang pynlong jingialang. Katei ka khubor ka la poi tiap ha kawei na ki lad pathai khubor ha Assam. Ka jingthoh (SMS) ha ka mobile ka dei ka jingthoh kaba la wan na u nombar uba la pyndonkam hapoh ka nongbah Shillong. La shem ba katei ka khubor ka dei ka khubor thok. Katei ka SMS ka la wan na u nombar jong ka Aircel kompani na Shillong – u nombar +919856930587, hadien ba la ioh jingtip ba u dei u nombar ba na Shillong, la pyntip ia ki pulit ka nongbah ha kaba mar-mar ki la wad ia u briew uba pyndonkam ia utei u nombar hangne ha nongbah Shillong.
Hadien katto katne por ba la wad ki pulit ki la lap ba utei u nombar phone u dei uba la pyndonkam da u Khajin Haloi, 38 snem karta uba shong ba sah ha Koriabijolighat. La kem ia u na Rynjah. Ki pulit ki la kem ia utei u briew bad ki la ioh ruh ban kurup ia ka mobile jong u.