Shillong: Ka ktem ki pulit Meghalaya kaba don ha Wazirabad ha Delhi ka la pra phum hadien ba ka la don ka jingkhie eriong mynta ka janmiet. La ioh jingtip ba ha ka por 6:30 baje mynta ka miet ka la don ka jingkhie eriong bad ka jingjur slap ha ki katto katne ki bynta jong ka Delhi. Ha katei ka jingjia la ong ba katei ka ktem ki pulit Battalion ka Meghalaya kaba shu ker dara da ki siej bad ki tyrpa shipai ki la khyllem.
La iathuh ba ha katei ka ktem ki don kumba 70 ngut ki pulit, la ong ba kane kam dei ka sien kaba nyngkong ba ki pulit ka Meghalaya ki la shah pynpra ia ka ktem jong ki ha ka bor mariang bad ka la jia teng ruh ha u snem 2016 ha ka por ba ka don ka jingshlei um.Ki lad khubor ki la iathuh ba ka jaka sah ki pulit Meghalaya ha Delhi ka long kaba isangsot naba bun ki ktem ba ki sah tang ha ki dara tyrpa thohrew.
