“Lada ia ki runar ki pyllait balei ia Kong Agnes ki eh ban pyllait”

Shillong, 13 Naiwieng:
Lada ia ki runar ba shyrkhei ka sorkar ka kloi ban pyllait balei pat ia ka Kong Agnes Kharshiing kaba iakhun na bynta ka hok ki eh ban pyllait la ong ka Kong Angela Rangad.
Ka Kong Angela ka la ong ba kin nang pynjur shuh ia ka jingiakhih jong ki halor ka jingdawa jong ki ia la ka hok bad ki la dawa ruh ba ka sorkar ka dei ban pyllait noh mardor ia ka Kong Agnes khlem kano kano ka kyndon.
Ka la ong ruh ba kane ka jingleh ka sorkar ka pyni ba ka thombor ia ki briew kiba duk basuk bad ka la ong ba kin nym ailad ba ka sorkar kan leh thombor bad kin nang iaid shakhmat khlem shongthait.
Ka la iathuh ba lashai ka sngi kin shong iapyrkhat ban thaw ki lad ki lynti ban nang pynbjur shuh shuh halor ki jingiakhih jong ki.
Lah ban kdew ba ka Kong Agnes ka la shah kem halor ka jingshah kynnoh ba ka leit ban pynthut ia ka jingkhynra iing ka Meghalaya Urban Development Authority (MUDA) ha shnong Umsawli da kaba iada ia ki nongshong iing beain ha ka jaka sorkar ha New Shillong Township (NST).
Ki pulit jong ka East Khasi hills ki la kem ia ka Kong Agnes halor ka FIR ba la ujor da u secretary ka MUDA u Tableland Lyngwa bad u Additional district magistrate Bah Donny M Wahlang pyrshah ia ka ba leit ban khang lad ia ki nongtrei ka MUDA ban kyndang ia ki iing ki briew ha ka thain Umsawli, Mawlong-Mawtari ha ka 8 tarik Naiwieng.