Sdang ka shad Pomblang da ka pom blang halor u lum

Shillong, 13 Naiwieng:
Ka shad Pomblang ka Hima Khyrim ka la sdang hynne ka sngi Balang da ka jingpyndep ia ka jingleh niam ia ka pomblang halor u lum ha Smit.
Kumba ju long ia kane ka Pomblang, la pyndep shwa halor u lum shwa ban poi sha ka sngi ban pynkut kaban long ar sngi.
Halor u lum, la pyndep ia ka jingpom ia ka Balang hadien ba la pynlong ia ka knia ka khriam jong ka Hima da u Sohblei.
Ki paidbah babun ki la wan sakhi ia kane ka pomblang kaba ju long man u snem. Ki dkhot jong ka longing Syiem ka Hima Khyrim, kynthup u Syiem rangbah Dr Balajied Syiem, ka Syiem Sad bad ka Syiem nalor ki dkhot ka longing syiem ki la don lang ha katei ka jingpyndep ia ka niam ka rukom ba la ioh sngew ia ka sur tem na ki bom ki ksing bad tang muri.
U Syiem ruh bad ki longsan ki la iashim bynta ha ka jingshad ha katei ka jaka pyndep ia ka leh niam ka rukom bad ki dhulia ruh.
Hadien ba la leit phai, yn bteng biang ia ka jingleh niam ka rukom ha iing sad ha Smit.
Lashai ka dei ka sngi kut jong ka shad ka kmen.