Shillong: Myn hynnin ka sngi ka FKJGP hapoh ka jingialam u President ka East Khasi Hills u bah Elton Warjri bad u President ka Mawprem Circle u bah Reginald Thabah ki la leit ban khynra Laisen khaïi (Trading License) bad laisen bylla (Labour license) na ki dukan bar jylla kiba don ha Garikhana ter ter sha Jhalupara bad Upper Mawprem. Ha katei ka jingleit khynra katei ka seng ka la khang ruh bun tylli ki dukan bym don kot don sla kiba don kumba 20 tylli eiei.
Ki dkhot ka FKJGP kiba leit ban khang ia ki dukan bar jylla ki bym don laisen: Rupang.
Ha ka por ba katei ka seng ka leit khynra dukan kiba bun ki dukan ha Garikhana ki la ai daw ba ki dang leit ban pynthymmai ia ka laisen jong ki bad ki la iathuh ruh ba kim donkam ban leit sha District Council na ka bynta ki jingdonkam jong ki, hynrei u don uwei u Inspector na District Council uba dei peit uba ju wan ban pynbiang ia ka jingdonkam baroh ha ki dukan jong ki bad ki shu siew beit ia u da ka pisa. Haba la kylli ia ka kyrteng u Inspector ki ong ba kim tip kyrteng hynrei ki shu tip ba u dei u Bahdeng Inspector.
Halor katei ka jubab ba la ioh na ki bar jylla u bah Reginald Thabah u la thalaiñ ia ka District Council, namar ka jingleh sting jong ka bad u la ong ba ka kamram jong ka District Council ka dei ban phah shithi sha kito ki bym wan pynthymmai laisen kumba leh ka Cantonment bad lada jia ba kim sngap ka dei ban weng noh shisyndon ia ka laisen jong ki, “Hynrei ngi lap ba ha jaka ban leit ki trai dukan sha District Council, ki Inspector ka District Council pynban kiba leit sha dukan ki bar jylla ban leit pynbiang ia ki kot ki sla jong ki, ngi sngewsih ba don pynban ki Khasi jong ngi kiba long Dalal ban pynsuk ia ki dkhar da kaba leit pynbiang ia ki jingdonkam baroh ha dukan jong ki” ong u bah Reginald Thabah.
Katba u bah Elton Warjri pat u la ong ba ka jingbym phah Enforcement jong u EM ba peit ia ka tnad khaïi pateng u bah Antonio War bad ka jingleit leh Dalal jong ki Inspector ka pynthrai sniew ia ka FKJGP ioh ka don eiei ka jingiadei ba sha lyndet hapdeng ka District Council bad ki bar jylla. Ki dukan kiba la shah khang mynta ka sngi ki kynthup ia ki jaka bam, ki dukan khap shniuh, ki dukan die tiar heh kum ka tin, paip bad kiwei kiwei. Hadien ba ka FKJGP ka la sangeh ka jingkhynra laisen la iohi ba ha ka por janmiet ki la don katto katne tylli ki dukan ha Garikhana ba kynthup ia ka dukan khap shniuh kaba la plie biang. Ha katei ka jingleit khynra ki la don ruh bun ngut ki nongtrei bar jylla ki bym don ia ka Laisen bylla ne ka Labour License.