Pan jingkyrshan ka UDP halor u kyrtong MP 22tarik Naiwieng yn rai ka HSPDP:Hoping

Shillong, 13 Naiwieng:
Ka Hills State People Democratic Party (HSPDP) kan sa pynlong ia ka jingialang jong katei ka seng, ha ka 22 tarik mynta u bnai. Nalor bun ki mat ban iakren halor katei ka sngi, ka seng, kan iakren ruh halor ka ilekshon MP ka ban long ha u snem ban wan.
Haba kren ha u nongaikhubor mynta ka sngi halor ka elekshon MP bad haba kylli la ka HSPDP kan kyrshan ia u Pastor Basaiawmoit ne kan pynieng la u jong u kyrtong u bah Hopingstone Lyngdoh uba dei u nongialam jong ka HSPDP u la ong” U Pastor Basaiawmoit u dei u kyrtong shimet (Independent) te bad ngin dang iakren, ka jingialang jong ka party kan long ha ka 22 tarik mynta u bnai”.
Ngin dang iakren ban wad kyrtong lang, la ong shuh shuh u bah Hopingstone Lyngdoh uba la iathuh ruh ba na ka liang jong ka United Democratic Party (UDP) ka la dep pan ia ka jingkyrshan na ka bynta ban iamir jingmut lang na ka bynta u kyrtong jongka bad ia kane ngin dang iapyrkhat ha ka jingialang ha ka 22 tarik, u la bynrap.
Lah ban pynkynmaw hangne ba na ka liang jong ka Party Khun Hynniewtrep National Awakening Movement (KHNAM) ka la shim ia ka rai ban kyrshan ia u kyrtong shimet u Pastor Basaiawmoit uba la pynkhreh na ka bynta ban iakhun ia kane ka ilekshon ban wan.
Na ka liang jong ka UDP ruh ka la dep shim ia ka rai ban pynieng la u jong u kyrtong na Shillong Seat ha kaba ka la pan ruh ia ka jingkyrshan na kiwei pat ki seng riewlum ha ka jylla bad ka la shim ruh ia ka rai ban kyrshan ia u kyrtong ka NPP na Tura Parliamentary Seat.
Na ka liang jong ka UDP ka la pynkhreh mynta ban pyniakhun da u bah Paul Lyngdoh uba u Working President jong ka party bad uba dei ruh u nongialam barim jong ka Khasi Student Union (KSU) uba ka party ka khmih lynti ba un ioh ia ka jingkyrshan ha kane ka elekshon MP ban wan.