Shillong: Ki pulit Meghalaya ki la pyntip a la mynjur ia ka mang tyngka kaba T.2,33,31,008 klur tyngka da u Commissioner of Police , Delhi na ka bynta ban shna ia ka jaka sah ki pulit bad kiwei pat ki jingdonkam ha Head Quarter jong ki pulit Meghalaya kaba don ha P.T.S Wazirabad.
Katei ka dei ka kam kaba sah teng naduh ba la phah pulit Meghalaya sha Delhi ha u snem 2008, katei ka Head Quarter ka dei na ka bynta ki 3 kompeni ki pulit Battalion kiba don kumba 300 ngut kiba don ha Delhi kiba sah ha ki ing dara bad ki ing tap shilliang.Na katei ka mang tyngka la thmu ban shna ia ka ophis treikam, na bynta ki ophisar, ka Dispensary bad ka jaka buh tiar siat. La lah ban pynioh ia katei ka mang tyngka hadien ka jingshimkhia jong ki ophisar rangbah ka tnad Ministry of Home Affairs, State Home Police, Delhi Police, bad u Commandant ba mynta bad barim jong ka 6th Battalion.