Shillong: Hadien lai tylli ki jingialehkai ha la iing, ka Langsning FC lashai ka sngi, kan iakhun shabar na la iing ha ka lynti iaid jongka ha kane ka i-league 2nd division. Lashai ka sngi, ka Langsning kan iakhun ia ka Jamshedpur ha madan JRD Tata Sports Complex, Jamshedpur kaba dei ruh ka Group C. Ka jingialehkai kan long ha ka por 5 pm.
Ka Langsning ka la sdang ia ka jingialehkai ha kane ka lympung lyngba ka jingjop 2-1 ia ka Chennaiyin FC ha ka 14 tarik u Lber, bad ka iakhaid 1-1 bad ka Bengaluru FCha ka 19 tarik u bnai ba la dep bad ka la shah rem noh ha ka 1-0 ha ka TRAU FC ha ka 26 tarik.
“Ngi don hapdeng ka jingktah namar ka jinglong ka suin bneng. Ka jingsngew skhem ki nongialehkai ka kham duna bha hadien ba la shah rem noh ha ka TRAU, hynrei ki bor ba dei peit ki la pyrshang ban saindur bha ia ka kynhun ban ai mynsiem ia ki khynnah nongialehkai,” la ong u coach u Bah Hering Shangpliang.
Ha kane ka jingialehkai ka Langsning ka don ka jingeh namar ba ki nongialehkai kynthup Kento Sakurai bad Ebormi Buam ki don ka jingmynsaw hynrei ki don pat kiwei kum u Poibiang Pohshna uba la lah ban mih madan.
Ka jingjop ka long kaba donkam bha ia ka Langsning ha kane ka jingialehkai namar ba ki dang kamai 4 point ban iaryngkat bad ka RAU bad ka Jamshedpur. Katba ka Mohammedan Sporting ka la kham jam shakhmat kaba la kamai 6 point.