Shillong: Ki ar tylli ki sengbhalang ha ri Lum Jaintia ka All Jaiñtia Student Union (AJSU) bad ka Jaiñtia National Council-West Jaintia Zone, ki la kynnoh ba u Chief Executive Committee ka JHADC u ma Andrew Shullai u la thung kam sop sop ia ki briew jong u hapoh District Council. U President ka JNC-WJHZ u bah Andy R Dkhar bad u Working President ka AJSU u bah P.S Phawa ki la ong ba ki don kumba 39 ngut ki briew kiba u CEM u la thungkam ia ki kum ki Grade IV.
Ki la kynnoh ba la thungkam khlem kano kano ka jingpynbna lane ka jingpyntip paidbah shaphang ka jinglaitkam hapoh District Council. Ki la dawa ba u CEM u dei ban pyndam noh ia katei ka jingthungkam sop sop jong u. Ki la byrngem lada um weng noh ia kitei ki briew kin leit ban ujor sha u myntri ba peit ia ka District Council bad kumjuh ruh sha u Lat ka jylla.
Ha kawei pat ka khubor, ka AJSU ( CB) bad ka JNC ( CB) ki la leit ban ia kynduh ia u EM ba peit ia ka khaii pateng ha JHADC u ma Winning Sungoh ban ia kren halor ka jingioh jingtip kitei ki 2 seng ba bun ki dukan bar jylla ki ioh laisen khaii khaii khlem da ioh NOC na ki bor shnong. Ki la ing ba ki dukan bar jylla kiba ioh laisen khaii khlem NOC ki dei kiba don hapoh u pud jong ka Newhill bad Iawmusiang, ki la ong ba kitei ki dukan ki leit ban pynthymmai laisen man u snem khlem NOC na ka dong Newhill lane Iawmusiang.
Ki nongialam jong kitei ki ar seng u bah Andy Dkhar bad u bah P.S Phawa ki la ong ba na ki trai shnong kiba die tang u waidong la khrong pisa manla ka sngi khlem jingmap shi suka ruh katba u bar jylla pat 4 snem kynthih u ioh laisen khlem da siew khajna. Ki la iathuh ba ka Fancy Cloth Store ka khlem ioh NOC la 4 snem hynrei ka dang pynthymmai thik thik ia ka laisen jong ka. Ki la iathuh ba ki la leit ban khynra laisen na katei ka dukan hynrei kham hadien ka trai ing ka la phone ia ki ban ia kren na ka bynta u trai jong ka dukan u Abdul Rahman Chaudhury. Kitei ki 2 seng ki la pyrshah jur ia ki briew kiba bynda kyrteng na ka bynta u bar jylla bad ki la dawa na u EM ka tnad khaii pateng ba un rah ia kane ka mat ha ka dorbar JHADC ka ban sdang lashai ka sngi ka 28 tarik u lber.