Nongpoh: Kam long kaba phylla ban tip ba ki bar jylla kiba wan ban bsuh khlieh sha kane ka jylla lyngba ki jingtrei ha ki jaka bapher bapher, ki la sdang ban pyni bor ia ki Trai Ri Trai Muluk bad halor kane la sakhi ruh ia ka jingshah shoh bad shah ktah kti uwei u Rangbah Khasi, uba la shah ktah kti ha ki bar jylla kiba trei hapoh ka jaka lum khana, kaba don ha 20Mer Pahammawlein, Ri Bhoi District.
Ki Draibar hapoh ka jong ka HTTA kiba la ialum hajan ka Toll Plaza ha Pahammawlein, ha ka Lah Sngi U Blei:Rupang
Kane ka jingjia ka la jia hynnin ka sngi ha ka por 2 baje ei ei ha katei ka Toll Plaza, ha ka por ba utei u Draibar uba la tip kyrteng kum u Bah Hiktorius Pariong, u Nongniah jong kawei ka Tourist Taxi kaba don ia u Number ML-05K-7579, ha ka por ba u dang wanphai na Guahati.
Haba iadei bad katei ka jingshah ktah kti ia utei u Nongniah kali, mynta ka sngi ka kynhun ki nongniah kali kamai hapoh ka shatri jong ka Hynniewtrep Tourist Taxi Association, ki la la hiar sha katei ka Toll Plaza kaba don ha 20Mer Pahammawlein, na ka bynta ban pynpaw ia ka jingpyrshah kaba jur halor katei ka jingshah ktah kti ha u Bar jylla.
Haba iakren bad u Bah Hiktorius Pariong, la ong ba ka daw kaba la pynlong ia u ban shah ktah kti ha kitei ki Bar jylla, ka dei namar ba um don pisa ban siew ha katei ka Toll Plaza.
U la ong ruh ba katei ka kali kaba u niah la bat da ka Principal Accountant General (Audit) Meghalaya Shillong bad dei na kata ka daw kaba la pynlong ia u ba um don pisa, hynrei ynda la poi ha katei ka jaka, kitei ki Bar jylla kiba ap ha katei ka Toll Plaza, kim sngap ia kaei kaba u kren, hynrei haba u la iathuh ba um don pisa, ki la shu ktah kti syndon ia u.
Haba iadei bad kane ka jingshah ktah kti ia utei u nongniah kali kamai, la mih ka jingpynrem na kiba bun ki briew, ha kaba bun ki la ong ba kane ka dei ka jingsdang jong ka jingpyni bor da ki bar jylla pyrshah ia ki Trai Ri Trai Muluk.