Shah kem uba kawang petrol bom

Shillong,12 Naiwieng:
Ki pulit ka nongbah mynta ka sngi ki la ioh kem ia uwei u samla uba la tip kyrteng kum u Faster Wahlong, 23 snem karta, ki pulit ki la kem ia u na iew polo, la kem ia u namar ba ki la suba jur ba u dei uba donkti ha ka ban kawang petrol bomb ia kawei ka dukan die kyiad( Wine Store) ha Khyndailad mynhynnin ka miet. Ki pulit ki la iathuh ba u Faster u la pyrshang ban kawang petrol bomb biang sa ia kawei pat ka dukan kyiad, hynrei ha katei ka por u la iohi ba ki pulit ki don hajan kumta u la phet krad noh. ‘Marsien iohi ia u IC ka Pasteur Beat House u SI KP Singh utei u samla u la phet krad noh’ ong ka khubor na u SP ka East Khasi Hills u Bah M Kharkrang uba la iathuh ba ka jingiabeh thong ki pulit ia utei u samla ka la neh kham slem hynrei ki la ioh kem pat ia u hadien, u la iathuh ruh ba kiwei pat ki paralok jong u ki la phet krad. Ka jingtohkit ia utei u samla ka dang iaid shakhmat.