Ym don bor ka KHADC ban rejister jaka:CEM

Shillong, 12 Naiweng:
Ka KHADC kam don satia ka bor ban rejister ia ki jaka hapoh u pud u sam jongka namar ba kam don ka ain.
“Ka Council ka la pdiang ia bun bah ki Land Bills ha ki snem ba la dep. Hynrei ia kane, la kyntait da u Lat halor ka nongrim ba ka ktien ‘transfer’ ne kynriah, kam paw ha ka Paragraph 3 jong ka Sixth Scheduled,” la ong u CEM ka KHADC Bah Pynshngaiñ N Syiem haba kren hynne ka sngi Hatmajai.
Katkum ka Paragraph 3 (a) jong ka Sixth Scheduled, u bah Syiem u la ong ba la thoh tang ia ka ktien ka jingai, ka jingsah ne ka jingpyndonkam ia ka jaka.
“Ngi kwah ban don ka ain khyndew jong ngi namar ba ka Council ka dei ka nongri ia ki jaka puta hapoh u pud u sam jongka hynrei kum kane ka kyndon, ym shym la kdew ha ka riti synshar ka ri”, la ong u CEM.
U la ong ba u Deputy Commissioner u don ka bor ban rejister ia ka jaka wat ha ki jaka ba hap hapoh u pud u sam ka Council katkum ka kyndon jong ka Indian Registration Act 1908.
“Ia mynta, ka Council ka don ka bor tang ban shu buh rekod ia ki jaka katkum ka jingpynbna ba la pynmih da ka sorkar jylla” la ong u Bah Syiem.
Shwa ia kane, ka Dorbar Ki Khlieh Nongsynshar Ka Ri Hynniewtrep ka la kyntu ia ka KHADC ban khot ia ka dorbar kyrpang ban pynbna ia ka Rules jong ki 53 Hima ha Khasi Hills namar ba ka Indian Registration Act 1908 ka dei ka ain kaba dkoh.
Ka Dorbar ka la ai jingmut ruh ia ka jingdonkam ban khot ia ka jingialang kyrpang hapdeng ka KHADC bad u Deputy Commissioners ha Khasi Hills, u Commissioner & Secretary, District Council Affairs department, Commissioner & Secretary Law, Advocate General, Additional Advocate General, bad u Standing Counsel, ban iakren ia ka jingthmu ban ai bor ha ki Hima, KHADC, bad ha ophis u Registrar, DC ban rejister ia ki khyndew ki jaka puta bad ban iada ia ki 16 tylli ki kyrdan bat khyndew ha Khasi bad Jaintia Hills.