Rahbor ka GNLA, 3 ngut ki nongkhaii

Shillong, 12 Naiwieng:
3 ngut ki nongkhaii ki la shah rahbor ha ki kynhun lehnoh ka GNLA katba ki dang leit sha ka iew kaba long shisien shi taiew ha Tebrongre, kaba don hajan Tikrikilla. Katei ka jingjia ka la jia ha ka step sngi nyngkong . Kitei ki lai ngut kiba la shah rahbor ki dei kiba la tip kyrteng kum u Dulal Roy, 50 snm karta u Manik Roy( 40), baroh ar ngut ki dei kiba shong ba sah ha Tikrikilla bad u Abdullah Ali( 40) u dei uba shong ba sah ha Gomaijhora, Assam. Ki rieng kieng atiar ki la rahbor ia kitei ki nongkhaii ha ka por mynsngi mynshai na iew Tebrongre, ka iew ba ki ju wan ban khaii manla ka por. Katkum ka khubor pulit , ka la iathuh 15 ngut ki riew kieng atiar kiba la suba ba ki dei ki GNLA ki la donkti ha ka kam rahbor ha kaba ki la rahbor ia kitei ki nongkhaii da kaba pynap suloi ia ki.
Katkum ka khubor ba la ioh lum, la ong ba kitei ki juh ki kynhun ki la leit ruh sha ka iew Gaptuli, ka iew kaba don marjan bad ka Tebrongre ha kaba ki la pyrshang ban rahbor sa ia uwei u nongkhaii hynrei u la lait phet. Utei u nongkhaii u la lait im na ka jingshah kawang da ka tari ha kitei ki kynhun ha ka ba ka tari kam shym la dei na ki met jong u hynrei ka la dei na ki bynta ka kti bad u don hapdeng ka jingmynsaw. Kane ka la jia shuwa ban kit ia kitei ki lai ngut.
U SP ka West Garo hills u Mukesh Singh u la ong ba ki pulit ki dang buddien ia ka tei ka kam ban kem ia kiba donkti u la ong ruh ba ki pulit ki la pynjur ia ka jingpahara da kaba iaid kylleng kylleng da ki kjat bad ki kali pulit, hynrei haduh mynta ym pat shym la lap dien eiei. Katei ka jingshah rahbor ka la jia wat hadien ba la phah da ki kynhun shpai ruh sha katei ka jaka.