Ka buit ka Congress ban ioh vote kiba nabar:Paul

Shillong, 11 Naiwieng:
U Working President ka UDP u Bah Paul Lyngdoh u la ong ba ka jingpynrung vote ia ki briew nabar ha ka thain Madanrting, dei tang ka buit jong ka Congress ban thaw vote na ki briew ba nabar jylla ban ioh kabu ha ka sain pyrthei.
“Ka dei ka jingleh kaba buhrieh hynrei kaba la tipshai lut baroh ba ka Congress ka shaniah ha ki vote ki briew ba shu wan naei naei khlem tip kiba dei shisha ne em ki nongshong shnong”, la ong u Bah Paul.
U la iathuh ba ka UDP ka la ujor ha u Chief Electoral Officer (CEO) u Prashant Naik ba dei ban sangeh shi syndon ia ka jingpynrung nongthep vote ia ki nongshong shnong kiba long artatien ha kane ka jylla. “Ngi la pynpaw ia ka jingsngewkhia kaba jur ba ka jingpynrung nongthep vote la leh ha Madanriting,”, la ong u working president ka UDP.
U la ong ba ka rai ban pynrung kyrteng ia ki nongshong shnong ba tang shipor ka long pyrshah ia ka riti synshar ka ri ba uwei u briew u dei ban don tang kawei ka vote.
U la buh ia ka jingbym iahap ia ka jingpynrung nongthep ia ki shipai kiba shu wan trei tang shipor. U la ong ba uno uno u briew uba trei kam, u lah ban leit buh kyrteng ialade kum u nongthep vote ha la ka jaka lajong.
“Ka long baeain ban pynrung kyrteng nongthep vote namar ba ki la dep buh kyrteng ialade ha la ki jaka jongki”, la ong u Bah Paul.