Ar ngut ki shipai BSF ki la kyllon iap hashen, hadien ka jingshah ther kuli ha ki runar kiba la suba ba ki dei ki dkhot ka GNLA. Katei ka jingjia ka la jia mynta ka step ha ka por 9 baje eiei. Ki ar ngut ki shipai kiba la kyllon iap ki dei kiba la tip kyrteng kum u Sachit Biswa bad u Pappu Kumar Yadav , baroh ar ngut ki dei ki shipai jong ka 73rd Batallion, ki la shah siat iap katba ki dang don ha kajaka pahara jong ki kaba jngai kumba shi kilo mitar shiteng na Kathakona outpost, kaba don hajan Borsora, ha South West Khasi Hills district.
”Shi kynhun ki lehnoh ki la thombor ia ki, uwei u shipai u la iap hashen katba u wei pat u la iap ha shiteng lynti ha ka por ba la pynkit ia u sha ka Hospital kaba don ha Guwahati” ong u heh shipai BSF uba la iathuh ba hadien ba ki la shah siat iap, ki runar ki la tuh ruh ia ki tiar siat jong ki ki INSAS rifles. Katei ka jingjia ka la jia tang hadien ar sngi ba 5 ngut ki pulit ka jylla ki la shah siat iap ha ki lehnoh GNLA.
Ka tyllong khubor ka la iathuh ba katei ka jingshah siat iap ki arngut ki shipai ka ia syriem thik kum ka jingjia kaba la jia ha South Garo Hills ha kaba 5 ngut ki pulit jylla ki la kyllon iap hashen hadien ka jingshah ther kuli ha ka kynhun lehnoh ka GNLA.
Ha kawei pat ka jingjia,ki shipai BSF ki la iathuh ba ha ka miet sngi palei ki shipai ki la ioh ban kurup ia bun tylli ki tiar siat na South Garo hills kiba kynthup ia kawei ka 9 mm carbine machine, ka 7.65 mm pistol kaba la shna ha Italy, ka 7.65 mm pistol ba la shna ha china, bad ki kuli, ka wireless set, ar tylli ki mobile phone, ki juti sport bad kiwei pat ki tiar la ioh kurup na ka khlaw Angratoli . Ki BSF ki la iathuh ba kitei ki tiar ki dei kiba la thmu ban pynpoi sha ki lehnoh kiba treikam ha ka ne ka jylla. Ia ki tiar ba la ioh kurup la aiti sha ki tnad treikam ba dei peit.
Phi don ban ong eiei?