Shah kem ka kong Agnes Kharshiing, ba thmu leit pynsangeh ia ka jingpynpra ka MUDA

Shillong,8 Naiwieng:
Tang ha shiteng ba ka dang don da ka jingthmu ban leit pynsangeh ia ka jing pynpra ing ka MUDA ha Umsawli, ka kong Agnes Kharshiing ka President ka Civil Society Welfare Organisation (CSWO) ka la shah pynsangeh ha ki pulit bad tang hadien katto katne por ki la kem shi syndon ia ka. Ka kong Agnes Kharshiing ka la shah kem ha ki pulit hadien ba u nongniah puh shilum ka MUDA bad u Executive Engineer jong ka ki la ujor pyrshah ia ka ka ha Rynjah Police station. U Banri PF Lyngdoh, Executive Engineer bad u Paul Micky Kharwanniang ki la ujor pyrshah ia ka kong Agnes Kharshiing ba ka la wan ban mushlia bad pynthut ia ki bor ka MUDA kiba dang pynpra ing ha Umsawli ha ka jaka ba la thmu ban tei ia ka New Shillong. Hadien ba la shah kem la wanrah ia ka kong Agnes sha Sadar Police station.
Ia ka kong Agnes ki pulit ki la pynngat haduh ar tylli ki case ha Rynjah Police station , kaba hap hapoh ka section 506/34, 109/186/188/353/332 of Indian Penal Code. Kan don haduh 14 sngi ha poh ka jingtohkit ka kashari.
Shuh shuh ha ka jingleit pynpra kaba la leh hynne ka sngi ka tnad MUDA ka la pynpra haduh 10 tylli ki ing kiba kynthup ia ki ing sah briew bad ki dukan kiba la tei be-ain ha kawei ka jaka jong ka North Eastern Electricity Power Corporation (NEEPCO) ba la ai da ka tnad MUDA.
Ka tnad MUDA mynta ka sngi ka la leit ban kyndang bad pynpra ia ki jingtei be-ainhapoh ka jingialam u Additional District Magistrate Bah Donny M Wahlang.Ka la sdang ia ka jingpynpra naduh ka por 10 baje mynstep.