Na Hillstar Hotel mih U Airmarshal, ka UDP Ranikor

Shillong,8 Naiwieng:
Ka UDP Youth Wing Ranikor Circle, ka la pynpaw ia ka jingsngew lyngngoh ia ka jingleh jong u President ka seng jong ka Ranikor circle, u Bah Khranglin Lyng khoi uba la khot jingialang ha ka 6 tarik mynta u bnai ha Hillstar Hotel tang ia kito ki dkhot kiba don ka jingiadei bad u. Ka UDP Youth Wing ka la iathuh ba toi ha ka jingshisha la thmu ban pynlong ia kate ka jingialang ha ka 18 tarik mynta u bnai ha Rangthong, hynrei ka jingleh jong utei u President ka seng ka la pynlyngngoh ngain ia ki samla ka UDP.
Shuh shuh ka seng ki samla UDP, ka la iathuh ba ki la ioh lum jingtip ba ha katei ka jingialang kaba u President u la khot ha Hillstar Hotel ki la shim ia ka rai ban pynieng da u Bah Airmarshal Diengngan kum u kyrtong ka seng na Langrin Konstitwensi ha kane ka elekshon MDC ka ban wan bad lada jia ba um ioh tiket na ka UDP ki la rai ban pynieng ia u kum u kyrtong shimet .
Ki samla UDP ki la kynthah jur ba katei ka jingleh jong u President ka seng, ka la pyni ia ka jinglong arsap jong u kum u nongialam ba ha khliehduh ka party, ki la dawa na u Secretary ka UDP Ranikor Circle ba un buh ia ka mat ia kren halor katei ka phang ha ka jingialang ka ban long ha ka 18 tarik mynta u bnai. Ka seng ka la kyntu ia ki dkhot ba kin ym shah ialam bakla ha kum kitei ki nongialam kiba im sngi ban pyrkhat tang namar ka myntoi shimet, ong ka kyrwoh na ki samla ka UDP Youth Wing.