Panchkula: Ka Minerva Punjab FC ka la thaw ia ka khana thymmai ha kaba ka la rah ia ka nam lahduh jong ka lympung Hero I-League da kaba pynliem ia ka Churchill Brothers da shi kol. Mynshem ia ka nam lahduh la rah da ka Aizawl, hynrei mynta ka Minerva Punjab kaba dei na nongbah Chandigarh.
Ka Churchill Brothers ka la hap ban hiar kyrdan sha ka 2nd division.
Ia kane kawei ka kol ka Minerva Punjab la thep da u William ban pynthikna syndon ia ka nam jop ia kane ka kynhun jong kane ka lympung kaba long hynne ka sngi. U William u la thep ha ka 16 minit.
Na ka liang u President ka All India Football Federation (AIFF) u Praful Patel u la ai khublei ia ka kynhun ialehkai ka Minerva Punjab Football Club hadien kane ka jingjop.
“Ka jingkitbok ia ka Minerva Punjab Football Club halor ka jingjop ia ka nam lahduh jong ka lympung Hero I-League 2017-18 bad ka jingioh ban rung sha ka lympung ACL Qualifiers ha ka aiom ban wan. Ka jingialehkai ka long kaba iakhaid bha bad kaba ktik mynsiem bad ka long ka jingkmen ia ka jingjop jongka”, la ong u Patel.