Kyntait rwai Tenancy Bill, u bah PN Syiem kum ki Congress

Shillong, 7 Naiwieng:
U Chief Executive Member (CEM) jong ka Khasi Hills Autonomous District Council (KHADC), bah PN Syiem wat la u dei u MLA jong ka Party Congress, hynrei um shym la rwai satia ia ka juh ka jingrwai halor ka Bill shongwai (Meghalaya Regulation of Landlord and Verification of Tenants Bill, 2013), pynban u ieng ha ka nongrim kum u khlieh jong ka Khasi Hills Autonomous District Council kaba peit na ka bynta ka bha ka miat jong ki bor synshar Hima.
“Ngi hap ban eksamin bha bad ngi hap ruh ban pan ia ka jingsngew jong ki MDC, ki Syiem, ki Rangbah Shnong bad kumjuh ruh ki sordar” la ong u bah PN Syiem Chief Executive Member (CEM) jong ka Khasi Hills Autonomous District Council haba kren bad u Rupang ha ophis treikam jongu halor ka Meghalaya Regulation of Landlord and Verification of Tenants Bill, 2013) kaba dei ka Bill ba la wanrah da ka sorkar Congress hapoh ka jingialam jong u Dr. Mukul Sangma kum u Myntri Rangbah.
Haba kylli pat, kaei ka daw kaba la pynlong ia ka District Council ba la synshar da ka Congress ba kan nym shim lang ia ka juh ka rai ba la shim da ka sorkar ba la synshar hi da ka Congress, u bah PN Syiem u la ong “Ka District Council ka mut ban peit ia ka bha ka miat jong ki khlieh nongsynshar tynrai, kumta hap ban shim lang ia ka jingsngew jongki”.
“Kata kam mih, namar nga shong hangne kum u Chief Executive Member (CEM) bad kum u CEM nga hap ban shim lang ia ka jingsngew jong ki khlieh nongsynshar naduh ki syiem, sordar bad Rangbah Shnong bad nga kren ia kane katkum ka kyrdam CEM ym kum u dkhot jong ka party” la ong shuh shuh u bah PN Syiem haba kylli hato ka Congress kam nym pynshitom ia u haba kum u dkhot jong ka party Congress um shym la mynjur lang ia kane ka Bill ba la wanrah da ka sorkar congress.
Ha ka juh ka por u bah PN Syiem u la iathuh ba, ka jingialang jong ki 53 hima kan long ha Khasi National Dorbar Hall ha ka lah sngi u blei ban wan bad ha kane ka jingialang yn iakren halor kane ka Bill bad yn iakren ruh halor ka jinglong jingman jong ka sain pyrthei ha ka jylla kaba la mih bun ki kynrym kynram hadien ka jingiakhih jong ki sengbhalang kiba la dawa ban pyntreikam ia ka ILP ha ka jylla.