Shillong: Ka BJP ka la kam ba kan jop ym duna ia ka 1o-15 ngut ki MLA ha kane ka kynti, wat la kam pat don MLA satia haduh mynta.
Haba kren sha ki lad pathai khubor, hadien ba la thep kyrteng hynnin ka sngi, u nongialam ka BJP u Bah AL Hek u la ong, “Ngi don ka thong ban jop ym duna ia ka 15 ngut”.
U Bah Hek u la ong ba ka party kan jop na ki jaka ba bun na Garo Hills, na Jaintia Hills, na Khasi Hills bad khamtam na ki konstitwensi kiba don ha sor Shillong.
U Bah AL Hek bad U Nalin Kohli, ha ka sngi leit thep kyrteng ha ka Sngi Hat Majai.
U Bah Hek u la ong ba ia ka shuki myntri rangbah ym pat lah ban rai mano ban shimti, namar ba kan shong ha ka rai bad ka jingbynshet jong ka party iano ka ibit ban bynshet ia kane ka kam.
Ha kawei ka liang, u nongpeit ka BJP ia ka Meghalaya u Nalin Kohli, u la kam ba ha kane ka kynti ka BJP kan sa jop bun ngut ki MLA.
Haba ther ia ka Congress ba ka la kiar na ki paidbah bad pyrshang ban wanrah da ka buit ban pyniapait hapdeng ki jaitbynriew, u Kohli u la ong, “Ka Congress ka la phet jngai na ki paidbah ka Meghalaya, namar ki kam bamsap, hynrei ka pyrshang ban wanrah ia ka buit pyniapait”.
Halor ka jingkynnoh ba ka BJP ka dei kaba shitniam, u Kohli u la ong ba u Myntri Rangbahduh ka ri u Modi u bam smai tang ha kawei ka kot bad kata ka dei ka Riti Synshar ka ri khlem iashah niam, ne iashah liang iano iano.
“Ka BJP ka ngeit ha ka nongrim ban wanrah ia ka roi ka par ia baroh khlem niew shiliang. U Myntri Rangbahduh ka ri u Modi u bam smai tang ha kawei ka kot bad kata ka dei ka Riti Synshar ka ri kaba wanrah ka jinngiaryngkat, ban mane laitluid, ban bam laitluid hynrei dei tang ka Congress kaba pynshit ban wanrah ka jingiapait jaitbynriew”, la ong u Kohli.
U la ong ba ka por ia ka jingkylla ka la wan bad ka por kan dei ia ka BJP ha kane ka kynti bad u syntiew lotus un phuh hapdeng ka jingtynjuh ba bun jait jong ka mariang ha kane ka kynti.
“Ngi la don ki kyrtong ba satar ha ki jaka ha sor kum u Bah JA Lyngdoh, Bah AL Hek, Bah Sanbor Shullai, Bah Antonio Neil War, Bah Arnest Mawrie”, la ong u Kohli.
U la ong ba ka BJP kam dei kumka Congress ban buh rieh ia ki kam ba la leh ia u paidbah. “Ka polisi jong ngi ka long ban wanrah ia ka roi ka par ia baroh hapoh ka jingialam u Myntri Rangbaduh ka ri u Narendra Modi”, u la ong.
U la kam ba ka BJP kan ialam ia ka sorkar ha kane ka jylla hadien ka elekshon. “Ngin thaw ia ka sorkar bad ngin ialam ha kane ka jylla Meghalaya hadien ka elekshon”, la ong u Kohli bad u la bynrap, ba ka BJP ka pynieng 47 ngut ki kyrtong tang ha ki jaka ba la don jingkyrmen ban rah ia ka thong bad kam kwah ban iakhun tang kum ka dak ban pyni paidbah.