Khie ka jingpang shit ha West Garo Hills

Shillong, 4 Naiwieng:
Ka kynhun jong ki doktor hapoh ka jingialam jong u Joint Director u R Budnah mynta ka sngi, ki la hiar bran bran sha West Garo Hills hadien ba la ioh jingtip ba la khie ka jingpang shit ba mih na jingdait u kain pyrjong.
U Myntri ka koit ka khiah u Bah AL Hek la iathuh ba ka sorkar ka la phah ia ka kynhun Rapid Response Team (RRT) ba la ialam da u Dr Budnah ban leit bran bran hadien ba la khie kynsan kane ka jingpang ha katei ka District.
U Myntri u la iathuh ba 18 ngut ki briew ki la kem pang na kane ka jingpang shit ha kane ka taiew ba ladep. U Bah Hek u la ong ba u la ioh jingtip ba kine kiba iohpang kidei na West Garo Hills.
Ia kane ka jingpang la lap nyngkong ha ka 18 tarik u Risaw ha kaba uwei u khynnah u la wan sumar hapoh Tura Civil Hospital ha ba u la ud pang baiong khlieh bad pang shit.
U Bah Hek u la ong ba ka sorkar jylla hadien ba la ioh jingtip ba la khie katei ka jingpang ha katei ka thain la pynher wut wut ia ki ki kynhun jong ka RRT.
U la ong ruh ba kitei ki 18 ngut kiba la ioh na katei ka jingpang 17 ngut la pyllait noh na hospital hadien ba ki la ioh jingsumar hynrei uwei u dang hapdeng ka jingsumar ha katei Hospital.
Na ka liang jong ka tnad Health and Family Welfare ki la pynbna paidbah ia ki briew ba kin long kiba husiar na kane ka jingpang. Ka Sorkar ka la bthah ruh ia ki briew ba kin long kiba leh khuid sharud sha kiar khamtam ha ki jaka ba lang um namar ba ki kain pyrjong ki ba wanrah ia katei ka jingpang ki shong ha katei ka jaka.