Pyrshah khang shnong Ladthalaboh

Shillong,4 Naiwieng:
Naduh ka 5 haduh ka 7 tarik mynta u bnai ki sengbhalang ki la pynbna da ka pakhang surok miet ka ban sdang naduh ka por 8 baje mynmiet haduh ka por 5 baje mynstep, bad kane kan treikam ha baroh kawei ka jylla, ha kawei pat ka liang kham ha shuwa ia kane ka Dorbar shnong Ladthala boh, ka la kyrpad lyngba ki lad pathai khubor ia ki sengbhalang ban ym pynlong iakhih ha ka 5 bad 6 tarik mynta u bnai namar ka shnong ka la buh tarik ban pynlong Fete na ka bynta ban pynmih pisa ban tei ka ing skul. Namar ka jingiatyngkhuh ka pakhang surok miet bad ka tarik ba la buh ban pynlong Fete ka dorbar Shnong Ladthadlaboh kala rai ka la rai ban pyrshah ia katei ka pakhang surok miet ki sengbhalang.
Haba iakren bad ki lad pathai khubor mynta ka sngi, u ma L.D. Lakiang uba long u Rangbah Shnong jong ka Ladthadlaboh ula pynpaw iaka jingsngewsih ba wat hadien ba ka shnong kala kyrpad lyngba ki lad pathai khubor ia ki Sengbhalang ba kin sngewbha ban ym pynlong prokram iakhih haka 5 bad 6 tarik kaba dei ka sngi kaba ka shnong kala pynkhreh ia iew pynmih pisa naka bynta ka ban thaw iingskul thymmai, hynrei ki sengbhalang kim patiaw satia.
Kaba sngewsih ka long ba naka liang jong ki paidbah kila kyrshan iaki jingkhot iakhih jong ka Sengbhalang ha kine ki sngi kiba la dep, hynrei naka liang jong ki sengbhalang pat kim pyrkhat iaka jingbhalang la ong u ma Lakiang.
U Rangbah Shnong ula ong ruh ba naka liang ka shnong kila pyrshang ban kynjoh ktien bad ki nongialam ki sengbhalang ha Jaintia hills hynrei baroh ki mobile phones kiba kine ki nongialam ki ju bat kim treikam satia.
Naka liang ka shnong kala pynkhreh ia kane ka Fete daki bun bun bnai mynta bad ka jinglut ruh ka long kaba bun, u ma Lakiang ula ong ba da ka jingbym banse na ka liang ka shnong ngi la rai ban iaid shakhmat bad ka Fete kaba ngi la thmu pynlong haka 5 bad 6 tarik u Naiwieng. Namar baki Sengbhalang kim patiaw iaka jingkyrpad jong ngi, ngi ruh ngim banse ban iaid shakhmat bad ka jingthmu babha jong ka Shnong.
U Lakiang ula ong ruh ba ka dorbar shnong kala rai ban kan ym don ka jingpakhang surok hapoh u pud u ang jong ka Dorbar shnong ha kiteki arsngi bad haka juh kapor ula kyrpad iaka ki paralok parajor ban sngewbha ban iawan shakatei ka fete ban kyrshan iakatei ka jingthmu kaba bha. Uma Lakiang ula pynkut ruh da kaba ong ba ki Sengbhalang kin kitkhlieh hi lada don kno kano ka jingjia kaba sngewsih hapoh kine ki sngi.