Shillong: 500ngut ki khlieh nongsynshar na Khasi Jaintia, ki la ia kynduh mynta ka sngi ia U Rahul Gandhi, ha ka jingdon ryngkat U Mukul Sangma myntri rangbah ka Jylla, U Ma Vincent Pala MP ka Shillong Constituency bad U Bah John F Kharshiing, Chairman Grand Council of Chiefs of Meghalaya.
U Bah John Kharshiing, ula pynsngew ia ka jingdonkam ban ai jaka ia ki khlieh nongsynshar ha ka riti synshar ri bad ula ong ruh ba kitei ki khlieh nongsynshar, kiba bun kiba don ha katei ka jingialang, ki la don ha ka jingshakri ha la ki jong ki kam, la 25-30 snem.
U Rahul Gandhi, President AICC, ha ka jing ia kynduh bad ki khlieh nongsynshar ha ka Sngi Balang.
Ki khlieh nongsynshar ki la pynpaw ia ka jingsngew diaw, halor ka jingbym pyntreikam ia ka ain Village Administration Bill 2015 bad ka jingphah sha ka tnat kam poh iing, ka bym don jingmut satia, kaba la phah da U Lat barim ka Jylla.
Haba jubab halor katei ka mat, U Mukul Sangma, u pynsngew ba ka la don ka jingialang jong ki khlieh nongsynshar, ki bor ka KHADC bad ka sorkar, ha ka 14tarik Nohprah 2017 bad la iakren ruh ba ka KHADC, kan pan biang noh ia katei ka ain VAB bad ba kan thaw da kawei pat, ha ka jing ia syllok bad ki khlieh nongsynshar bad halor ka jingshim jaka jong ka tnat pynroi sor, la mynjur ban iatreilang bad ki Town Committee ban thaw da ka KHADC, katba kum ka ain jong ka Meghalaya Town & Country Act 1973.
U Rahul Gandhi, haba kren u pynsngew ba ka Congress, ka burom ia baroh ki dustur ki riti jong ki jaitbynriew ha ka Ri, katba ka RSS bad ka BJP, ka don da kawei pat ka jingiohi jongka. Ula kren shai ruh, ba un trei tyngeh, ba ki khlieh nongsynshar, kin ioh ia ka jing ithuh da ka sorkar
U Ma Vincent Pala, u iathuh ba ula pyrshang tyngeh ban pynsngew ia ki jingeh jong ki khlieh nongsynshar ha Delhi bad ula pan por ban ia kynduh bad U Rajnath Singh, myntri kam poh iing, la lai bnai kynthih, hynrei haduh mynta, um shym la ai por satia bad ula ong shuh shuh, ba ha ka komiti ban pynkylla ia ki ain treikam ka Sixth Schedule, ki dkhot ka BJP, ki pyrshang ban pynkylla ia ki kyndon trei kam ka Sixth Schedule.