Shillong: Ka jingiaknieh tiket ka jur bha mynta ha Nongstoiñ konstitwensi kata ka long hapdeng u bah Albinus Khabani bad u bah Gabriel Wahlang. Ki lad khubor ki la iathuh ba u bah Gabriel Wahlangu dei u paralok ba jan bha bad u myntri rangbah ka jylla u Dr.Mukul Sangma uba la thung ruh ia u kum u MDC shu sieh ha KHADC, katba u bah Albinus Kharbani pat u dei u paralok ba ia jan bha bad u MP ka Shillong u bah Vincent Pala.
La iathuh ba ha kine ki khyndiat sngi u bah Albinus u la shah sospon na ka seng Congress bad la kynnoh ba u pyrshah Party bad hadien ka jingshah sospon jong ym don shuh ki nongpan tiket Congress lait noh tang u bah Gabriel Wahlang marwei hi. Hynrei dei ha ka 2 tarik mynta u bnai ba ka MPCC ka la khot biang ia u bah Albinus bad ka la weng noh ia ka jingsospon ia u bad ka la ong ruh ba lada u kwah ban pan tiket Congress u lah ban aplai noh mynta.
Kumta hadien ka jinglait sospon u bah Albinus u la aplai ia ka tiket Congress hynrei la iathuh pat ba katei ka jingaplai tiket jong u bad ka jingshah pyllait sospon ka dei namarba u la ia sngewthuh jingmut bad u bah Vincent Pala. La ong ruh ba dei u bah Pala uba la phah ia u ban aplai tiket na ka seng Congress.
Haba ia kren bad u bah Albinus u la ong ba la sospon ia u hynrei ha ka 2 tarik mynta u bnai ka MPCC ka la khot ia u bad ka la ong ba u lah ban aplai tiket lada u kwah ia khun, kumta u la aplai. Haba kylli u la ong ba u don ka jingkyrmen kaba skhem ba un ioh ia ka tiket na Nongstoiñ konstiwensi bad u long ruh uba la khreh ban ia khun ia ka elekshon.