Sengbhalang sangeh iakhih, ngin sa khot iakren: Mukul

Shillong, 1 Naiwieng:
U Myntri Rangbah u Mukul Sangma u dang pyneh hi triang ban nym khot iakren ia ki sengbhalang katba ki dang bteng ia ki jingiakhih.
U Mukul u la ong ia kane hadien ba la pynlait paidbah ia ka Meghalaya Regulation of Landlords and Verification of Tenants Bill hapoh Secretariat haba iakren bad ki nongthoh khubor.
“Nga kwah ban kren shai, ai ba ki sengbhalang kin nang iaid sha khmat ha ka jingiakren jong ki bad ngi ruh ngin peit ia ka jingai jingmut jong ki”.
U la ong ba ka sorkar kan ap ia ki jingai jingmut bad kwah ruh ba ki seng bhalang kin pyni ia ki jingsngew khia jong ki ban ai jing mut sha ka sor kar. “Kaei kaei kaba la dep jia myn shwa ha kaba ki sengbhalang ki la shim ia ka ain ha la kti, kan long kaba la dep”, u la ong. “Ngi donkam ban eksamin la ki kwah ban iakren baroh, ka sorkar kan hap ban bishar”, u la ong u Mukul.
U la ong ba ka jingpynlait paidbah ia kane ka Bill, kan plie lad ia ki paidbah ban ai jingmut sha ka sorkar halor kane ka Bill khnang ba kan lah ban pyntreikam ha ka rukom kaba biang.
U la ong ba ki sengbhalang ki dei ban long kiba la ih ha ka jingmut jingpyrkhat kiba kitkhlieh ia ka imlang sahlang, da kaba kiar ban shim ne iaid da ki lynti ba pyrshah ia ka ain.
U sngew ba ki sengbhalang ki dei ban shim ia ka kabu ban ai jingmut sha ka sorkar khnang ba yn lah ban pynurlong ia ka jingangnud jong ki paidbah.