Kyntait u Secretary Law, ba la jah ki dulir ain Halor ka jingkynnoh ka kong Agnes

Shillong, 31 Risaw:
U Secretary ka tnad kam ain jong ka sorkar jylla u la pynbna ba ki ain baroh ba la thaw da ka sorkar kim shym jah satia naduh ba mih ka jylla Meghalaya bad u la kyntait ia ka jingkynnoh ba la don ki ain kiba la jah.
Haba pynshai halor ka jingkynnoh jong ka President ka CSWO Kong Agnes Kharshiing kaba kynnoh ba ki don ki ain ba la jah, u LM Sangma u la ong ba naduh ba sdang ka jylla Meghalaya baroh ki ain ba la mynjur da ka sorkar jylla ki biang bad ka jingthmu ban ujor ejahar kam shym long kaba shongnia ne kam bym don daw eiei.
Ka President ka CSWO ka ba pan ia ka jingtip da ka RTI la shah ba kan wan peit ia ki ain bad la ai kopi ruh sha ka da u PIO. Ym shym tip pat balei ka President ka CSWO ka kwah ia ka gazette kopi jong ki ain haba ia ki kopi ba la soi da u Lamphang, u Lat bad u President la ai sha ka.
Kumba 400 spah kopi jong kawei pa kwei ka ain la sam bad la shon da ka Directorate of Printing and Stationery ka Meghalaya sorkar jylla, la ong u Secretary ka tnad kam ain ha ka kyrwoh ba la pyllait.
Kane ka tnad kam ain ka la shon ruh ia ki ain man u snem khnang ban nym kyrduh kopi haba donkam. Bad ia ka jingtip ba la pan da ka President ka CSWO la pynioh lut.
Nalor kane ka sorkar ka la buh lut ia baroh ki ain ha ka website. Namar kata ka jingthmu ban ujor ejahar kam long kaba shongnia la pynkut ka kyrwoh na u Secretary kam ain ka sorkar jylla.