Ba shah thang 3 tylli ki ophis sorkar Pynngat MPDA, ia u President ka HANM West Khasi Hill

Shillong, 30 Risaw:
U President jong ka Hynniewtrep Achick National Movement (HANM), West Khasi Hills u bah Arphul Kharbani uba la shah kem ha ka 26 tarik jong u bnai ba la dep u la shah pynngat ha ka kyndon ain Meghalaya Prevention and Detention Act (MPDA), kaba dei ka ain ban set phatok 3 snem kynthih khlem da shah ban bah jamin.
Katkum ka khubor ba thikna ba la ioh lum mynta ka sngi la iathuh ba, na ka liang jong u Deputy Commissioner (DC) jong ka West Khasi Hills District u Bah S Kharlyngdoh u la soi ia ka kot na ka bynta ban pynngat ia utei u nongialam ka HANM West Khasi Hills hapoh ka kyndon ain MPDA.
Ki khubor ki iathuh ba, ki pulit ki la pynngat ia une u nongialam ka HANM na West Khasi Hill halor ki 3 tylli ki mukotduma, kata halor ka jingthang ia ki 3 tylli ki ophis sorkar kaba kynthup ia ka jingthang ia ka ophis jong ka tnad Public Work Department (PWD), ka jingthang ia ka ophis jong ka Fishery bad kumjuh ruh halor ka jingshah thang jong ka ophis KHADI.
Kumta halor kitei ki 3 tylli ki mukotduma shah thang ophis mynta ka sngi na ka liang jong u DC u la soi ia ka kot ban pynngat halor ka kyndon ain MPDA. Shuh shuh ki khubor ki iathuh ba, ia une u nongialam jong ka HANM uba la pynngat ha ka kyndon ain MPDA mynta ka sngi yn leit rah noh sha phatok Silchar na ka bynta ban set phatok.
Lyngba ka jing pyn ngat MPDA ia U bah Kharbani, mynta ki la don 2ngut kiba ngat MPDA, ha kane ka jingiakhih, kaba la neh la ar bnai eiei bad uwei na kitei dei U bah Eldi Newton Lyngdoh, uba dei U Information Secretery jong ka FKJGP Central Body, uba shah kem na Umsning bad uba la shah kynnoh, ba u pynshit ia ki kam kawang petrol bom ha ki jaka lehniam bad kiwei de ki jingjia. La set ia U bah Eldi mynta ha phatok Williamnagar.