Bym treikam ka pakhang shnong ka kong Irene “Haba ki briew kim don shuh ka mynsiem sngewsynei, ngi lei ngin leh aiu”

Shillong, 30 Risaw:
“Haba ki briew kim don shuh ia ka mynsiem sngewsynei, ngi lei ngin leh aiu” ki dei ki kyntien kynthoh jong ka kong Irene P Hujon Nongialam jong ka Civil Society Women Organisation CSWO (I) haba u nongaikhubor u la buh jingkylli kaei ka jingsngew jongphi halor ka jingbym treikam ka pakhang shnong ba la khot pynlong da ka seng ha kane ka lah sngi U Blei ba la dep.
Ka kong Irene ka la iathuh ba, ka nongrim ba ka seng ka ieng ban khot pyn long ia katei ka pakhang shnong ha ka lah sngi U Blei ka long ban pyn paw ia ka jing sngew synei bad ban pyn paw ia ka jing sngew pyr shah halor ka jingshah thang jong u Vikash Nandwal (uba khlad noh) namar ngi khein ba ka dei ka mynsiem briew, ne tang ba dei u bar Jylla udei u mrad, la kyn thoh buh jingkylli ka kong Irene. Na ka liang jongngi, ngi shim ba la u Khristan, Hindu ne uei uei ruh u dei ka juh ka mynsiem briew bad halor ka jingbym iatreilang jong ki paidbah kiba la pynkhein ia kane ka pakhang shnong ka la ong, shano ka mynsiem Khristan, ngi dei ki briew bad ngi sngewsih halor kane, ka la bynrap.
Ka la ong ruh ba, na kane ka jingbym iatreilang jong ki paidbah halor kane ka pakhang shnong ka pynpaw ba, ym don shuh ka mynsiem sngewsynei bad ym don shuh ruh ka jingiatylli jong ka jaidbynriew bad ngin leh kumno, ka la ong shuh shuh.
“Ngim salia wat lada ki paidbah kim kyrshan ia ka pakhang shnong ba ngi la khot pynlong namar kane ka paw ba kam don shuh ka jingiatylli bad kam don shuh ka tip briew tip Blei” la ong shuh shuh ka kong Irene P Hujon nongialam jong ka seng kynthei CSWO (I), haba kren ha u nongaikhubor mynta ka sngi.