Ther u Bah Ban ia ka KHADC, ba tuh maw ki khar Bangla

Shillong, 29 Risaw:
U MDC ka Mawkhar u James Ban Basaiawmoit u la ther ia ka tnad Khlaw ka KHADC namar ba kam tip ia ka jingwan tuh maw ki khar Bangla ha thain Majai kaba don ha khappud ka India bad ka Bangladesh.
Haba wanrah ia kane ka jingkylli, halor ka jingjur ka jingwan tuh maw ki khar Bangladesh na thain Majai, u Bah Ban u la ong ba ka long kaba sngew sih ba ka KHADC kam tip ia kane haba ki da ki spah bad hajar ki khar Bangladesh ki la wan tuh na katei ka thain.
“Nga la iohi da ki khmat ba ki khar Bangla ki la wan tuh maw na ka thain Majai ryngkat ka jingiada ki shipai BSF”, la ong u Ban bad kyntu ba ka district council ka dei ban leh mardor ban khang lad ia kane. Halor kane, u Executive member Bah Jansing Tynsong u la ong ba ka Council kam ioh jingtip ei ei ia kane, namar ba khlem ioh jingujor eiei. U la ong ba katei ka jaka ka don ha khappud ka India bad ka Bangladesh bad na ka liang ka Council kan sa peit ia ka jingwanrah u MDC ka Mawkhar halor kane.
Halor ka jingkylli u MDC ka Sohra ka don ne em ka jingpan NOC da ki exporter haba ki shalan maw sha Bangladesh, u Bah Jansing u la ong ba ka Council kam ju ioh kano kano ka jingpan NOC da ki nongkhaii maw sha Bangladesh haduh mynta.