Sngewlem ia ki MDC ba la khlad

Shillong, 29 Risaw:
Ka iing dorbar jong ka KHADC ka la kynmaw burom hynne ka sngi ia MDC ba la khlad noh kynthup Bah FK Ryntathiang bad u Bah SR Moksha.
U Bah Ryntathiang u la khlad ha ka 29 tarik Nailur mynta u snem u dei u MDC jong ka KHADC naduh u snem 2009 na Mawthengkut constituency haduh ka jingkhlad noh jongu.
Hynrei u Bah Moksha uba khlad ha ka 25 tarik Naitung mynta u snem, u dei u MDC jong ka Council naduh u snem 1967 haduh 1972 uba mihkhmat na Umsning constituency barim.
U CEM ka KHADC u Bah Pyngshngain N Syiem u la ong ba ka jingkhlad noh kine ki nongialam ka long ka jingduh kaba khraw ia ka jylla bad ia ka Council.
“Kum ki dkhot jong ka iing dorbar ki la noh synniang shibun ia ka bha ka miat jong ka Council bad ka jingkhlad jongki, ka long ka jingduh shisha” la ong u CEM.
Haba pynkynmaw ia ki kam jong u Bah Ryntathiang, u CEM u la ong ba kum u khunswet, u Bah Ryntathiang u la ri ruh shibun ki khunswet ha la iing lajong.
“U Bah Ryntathiang u la don ka mynsiem shakri lem kaba pyniapher na kiwei pat ki para nongialam” la ong u CEM.
Kumjuh ruh u MDC ka UDP Bah Tistosstarwell Chyne u la ong ba ka kaba kongsan eh kaba sngew tynnad ia u Bah Ryntathiang ka dei ka jinglong sngewrit jongu.
U Bah Titos u la ong ba ka jingkhlad kyndit u Bah Ryntathiang kan long ka jingduh ia ki paidbah ka Mawthengkut constituency.
Kiwei kiba kren ki long u Deputy CEM Bah Remington Pyngrope, u Executive Member Bah Antonio War, ka Kong Irin Lyngdoh, ka Kong Grace Mary Kharpuri, kong Teilinia Thangkhiew bad kiwei.