Shi bnai yn pyndep ka KHADC ia kam phiah constituency

Shillong, 29 Risaw:
Hadien ba la ioh jingbthah na u Lat ka jylla u Dr KK Paul, ka KHADC ka la buh thong ban pyndep noh hapoh u Naiwieng ban wan ia ki kam ki jam ban phiah ia ki MDC constituency.
“Ngim don lad shuh hynrei ngi hap ban koh nguh ia ka jingbthah jong u Lat ka jylla ban thaw ia ka Delimitation Committee. Ngin pyndep ia ka kam ka jam ba iadei ban phiah ia ki constituency shwa ban kut u Naiwieng”, la ong u Chief Executive Member (CEM) ka KHADC u Bah Pyn shngaiñ N Syiem ha ki nongthoh khubor mynta ka sngi Hatmajai.
Ka Delimitation Committee ban thaw yn khlieh da u nongbishar ka District Council Court lane uno uno u majistor.
“Ngin pynkhreh ban thaw noh ia ka Delimitation Committee,” la ong u CEM U CEM u la ia thuh ba ka Delimitation Committee kan pynkhreh ia ka kaiphod ban aiti sha ka Executive Committee (EC) bad hadien kane, yn leit rah ha iing dorbar ka Council ban ioh ia ka jingmynjur.