Pynkhreh ka KHADC ban pas ain thung Rangbah Shnong

Shillong, 28 Risaw:
Ia ka ain thung rangbah shnong ka Khasi Hills Autonomous District (Village Administration) Bill, 2013 la khmih lynti ban pas noh ha kane ka dorbar synrai ka KHADC ban sdang lashai ka sngi Hatmajai.
Yn rah ia kane ka Village Administration Bill, 2013 ha ka dorbar hadien ba la bsuh ia ki jingai jingai jingmut jong ka Select Committee, la ong u Chief Executive Member (CEM) ka KHADC u Bah Pyn shngain N Syiem ha kane ka sngi Nyngkong.
Katkum ka jingong u Bah Pynshngain, ka Executive Committee ka la dep rai ban phah ia kane ka Bill sha ka Select Committee ha ka dorbar kaba la dep hadien ba ki MDC ki la rah ia ka jingujor ia ka jingthmu ban pas ia kane ka Bill.
“Ngi kyrmen ban pas noh ia kane ka Bill ha kane ka dorbar ba mynta”, la ong u CEM ka KHADC.
Ha kajuh ka por, u Bah Pynshngain u la iathuh ban leit rah ruh ia ka jingpynkylla ia ka Khasi Hills Autonomous District (Appointment and Succession of Syiem, Deputy Syiem, Electors and Rangbah Shnong of Mylliem Syiemship) (Second Amendment) Bill, 2012.
“Ia kane ka Bill ruh la phah sha ka Select Committee namar ba ka dang don bun ki jingai jingmut na ki MDC”, la ong u CEM.
Ka KHADC ka la pyrshang ban pynkylla ia ka Section 20 jong ka Khasi Hills Autonomous District (Appointment and Succession of Syiem, Deputy Syiem, Electors and Rangbah Shnongs of Mylliem Syiemship) Act, 2007 ban plie lynti ia u myntri ka hima Mylliem u Bah Mahindro Rapsang ban iakhun ia ka elekshon 2013 khlem risain shwa na ka kam.
Hynrei namar ba ym lah ban pas ia kane ka Bill, u Bah Rapsang u la hap ban risain noh na ka kam myntri ban iakhun ia ka elekshon.
Kiwei ki lad khubor, ki iathuh ba ki MDC Congress , ka KHADC mynta ka sngi ki la pynlong ia ka jingiakynduh ba kyrkieh jong ki na ka bynta ban ia kren halor ka tamasa mawbynna, kaba la long ha Mawphlang.
La ong ba ha katei ka jingiakynduh ki la don bun ki mat ba ki la iatai halor ka Tamasa Monolith bad hadien ka jingiataia la iathuh ba ki la dawa na ka EC ba ka dei ban ai ka jingkhein jingdiah kaba biang kaba la pynlut ha ka Monolith ha ka Ing Dorbar ka KHADC kaba yn sdang naduh lashai ka sngi.