Plie pyrda ia ka Jubilee 75snem ka Parish Mawlai

Shillong, 28 Risaw:
Ki paid Khristan jong ka Mawlai Parish ha ka 27 tarik ki la dap sa ka mynsiem jingkmen ha kaba ka Parish ka la plie pyrda ia ka Jubilee ba 75 snem. U Archbishop Dominic Jala SDB, u bishop jong ka Shillong u la kyntiew ia ka lama jubilee bad u Bah AL Hek, U myntri ba peit ia ka koit ka khiah jong ka sorkar Jylla, u la long kum u kongsan ba ar, ha kaba u la plie ia u maw sah jingkynmaw ia ka jubilee ba 75 snem. U Bah Embhahlang Syiemlieh, u MLA ka Maw lai ruh u la don ryngkat ha kane ka sngi.
U lyngdoh niam jong ka Mawlai, u phadar Roland Kharkrang SDB, ha ka jingpdiang sngewbha jong u, u la ong ba ka long ka jingkmen ba ka parish ka la jam sha kane ka phang bad ha kine ki 75 snem ba la dep u Blei u la don barabor bad ki khun ka Balang bad ka jingtrei. U la kynmaw kyrpang ia kito ki lyngdoh kiba la trei shitom ha kane ka Parish. U kynmaw kyrpang ia kito kiba la khlad noh.
U Archbishop Jala ha ka jingiathuh khana jong u, u la ong ba ka jingkyrkhu u Blei ka iai don barabor ryngkat ha kine ki snem ba la leit noh. U la ban ruh ia ki paid Khristan ban duwai ba u Blei un nang kyrkhu shuh shuh ia ka parish bad ka jingtrei jong ki lyngdoh. U la pynkynmaw ruh ia ki paid jong ka parish ban duwai na ka bynta ka jingsuk ha ka sor Shillong baroh kawei.
U la ong ruh ia ki Khristan ban duwai na ka bynta ka mynsiem jong u Vikash Nandwal, u nongkhaii ha sor uba la khlad noh nadien ba u la shah thang ha ki briew ha kine ki taiew ba la dep.
U Archbishop u la ong “duwai na ka bynta ka jingsuk ha sor, khnang ba ka nym don ka jingpynwit pynwa ia u duk u suk.”
Ha kane ka sngi ruh ki paid Khristan Katholik jong ka parish ki la ioh ban shim bynta ha ka procession Maria ka ba juh long man u snem ha une u bnai.
Wat la u la slap jur ruh, ki Khristan da ki phew hajar ki la ia shim bynta shitrhem ha kane ka procession ban ai burom ia ka Maria Theisotti, ka kmie u Trai Jisu Khrist.
Kum ban shu pynkynmaw, ka Mawlai parish ha ki por mynshuwa ka kunthup ia ka Bhoi baroh kawei. Bun kiwei pat ki parish ki la phiah na kane ka parish bad ha une u bnai ban wan sha kawei ka parish thymmai ha Umbir kan sa phiah biang na kane ka parish kmie.