Hap bam smai ban shongwai da ka ain u Mukul: SOMALA

Shillong, 28 Risaw:
Ki trai shnong ka jylla ki hap ban bam smai lada ki leit shongwai ha kano kano ka iing katkum ka ain ba la pynkhreh da ka sorkar ka Meghalaya Regulation of Landlords and Verification of Tenants Bills 2013.
Ka SOMALA ka la ong ba kane ka Bill ka thmu ban wad bniah ia ka jinglong trai shnong jong baroh ki nongshong wai ia u Dkhar ne Khasi lyngba ki syrnod ki ba bun rukom.
Kawei na kita ki syrnod ka long ka Residential katkum ka kyndon 8(1). Ia kine ki syrnod dei ban pynshisha da kaba bam smai hakhmat u majistor lyngba ki Affidavit katkum ka form A, la ong ka SOMALA.
Ka SOMALA ka la buh jingkylli kumno ki trai shnong kynthup Khasi, Jaintia bad Garo ki donkam ban da bam smai ban pynshisha ia ka jinglong trai shnong jong ki ha la ka jong ka ri.
“Ngi la sngewdei ba ki trai shnong kum ki khasi,Jaintia bad Garo kim dei ban bam smai ia ka syrnod jaka sah jong ki”, la ong ka SOMALA.
Ka seng ka la ong ba ka sorkar ka dei ban weng noh ia ka jingpyndonkam da ka Affidavit katkum ka form A na ka bynta ki trai shnong. Hynrei ka pynpaw ka jinglyngoh ba ka kyndon 3 jong ka Tenancy Bill kam ktah ia ki nongshong wai kiba shong ha ki jaka jong ka sorkar pdeng haki jaka jong ka sorkar jylla bad ha ki jaka jong ki Kompeni kiba hap hapoh ka thapniang jong ka sorkar.
Shuh shuh ka seng ka la ong ba ka Tenancy Bill kam kren eiei ia ki briew ki ba shong shabar na ki iing shong wai kiba shong ha iing jain, iing dara lane ki iing ki ba shong ha ki iing kiba khlem jingker jingda kum ha ki rud surok.
Kumba ka paw ka Tenancy Bill ka ithuh tang ia ki katto katne ki mynder kiba long ki nongshong wai ha ki iing briew bad ym ia baroh ki mynder kiba wan kiew sha Meghalaya.
Ka Tenancy Bill ka ktah jur ia ki trai shnong kiba shong wai namar ki hap ban bam smai ban ioh ia ka jingithuh ia ka syrnod jaka sah jong ki.
Kane ka Bill kam kren eiei ia ka jingwan tuid kyrthep ki mynder bad ka sorkar kadei ban pyntreikam pura ia ka Meghalaya Transfer of Land Regulation Act 1971 kaba paw la 40 snem ka sorkar kam nud satia ban pyntreikam ia ki kyndon tehlakam jong katei ka ain haduh mynta.
“Ngi la kyrpad ia ka sorkar ban pyntreikam de ia kiwei pat ki ain kiba pynrkhing ban tehlakam ia ka jingwan tuid ki mynder”, la ong ka SOMALA.