Ym treh iasnohkti ka MCF bad ka pakhang shnong ka CSWO (I)

Shillong, 27 Risaw:
Ka Meghalaya Citizen Forum (MCF) ka seng ki bar jylla trai ri kiba la im la sah ha kane ka jylla da ki phew phew snem kiba im ja na ka jingkamai die dukan kum ha Khyndai Lad bad kumjuh ruh ha Iewduh ki la pynbna ba kim iadon bynta ei ei ruh em ba kino kino ki jingiakhi bad khamtam ka pakhang shnong ka ban long ha ka 28 tarik mynta u bnai ba la khot da ka Civil Society Women Organisation (I) . Ia katei ka jingkhot pakhang shnong la khot da ka CSWO (I) hapoh ka jingialam ka kong Irene Hujon kaban long ha ka 28 tarik kaba long ruh 12 kynta kata naduh ka por 5 baje mynstep haduh ka por 5 baje janmiet.
Na ka liang katei ka seng ka la rai ban k hot ia katei ka pakhang shnong kum ka dak ban pyrshah ia ka jingshah thang utei u nongkhaii u Vikash Nandwal ha Motprhan uba la khad noh mynta ka sngi.
“Ngi pynpaw ia ka jingsngewsih kaba khraw halor ka jingiap jong u Vikash Nandwal bad ngi pynrem jur ia ki runar kiba donkti halor kane ka jingiap jong u”, la ong ka kong Irene haba kyntu ia baroh ki paid nongshongshnong ka Jylla bad ki Nongkhaii ba kin iatreilang ha kane ka pakhang shnong ba 12 kynta. Hynrei na ka liang ki nongkhaii bar jylla trai ri kiba la im da ki phew snem hapoh katei ka lama MCF ki la pynpaw beit ba kim iadon kti bad kin plie beit ia ki dukan jongki naduh Police Bazar shaduh Iewduh ruh kumjuh ha katei ka sngi.