Sdang biang ki sengbhalang,ka pakhang surok ba 3 miet kynthih

Shillong, 27 Risaw:
Ki 13 tylli ki sengbha lang ki la bteng biang ia ka jingiakhih ban dawa na ka sorkar jylla ban pyntreikam noh mardor ia ka Inner Line Permit ( ILP) hapoh ka jylla, da ka pakhang surok miet kaaba 3 miet kynthih, naduh ka miet jong ka 29 tarik mynta u bnai.
Ia katei ka rai ki sengbhalang ki la shim hadien ka jingiakynduh lang kaba kyrkieh. Ka jingpa khang surok kan sdang ha ka 29 tarik naduh ka por 7 baje mynmiet haduh 5 baje mynstep ha baroh lai miet.
U President ka GSU u Tengsak G Momin u la ong ba ki nongialam jong ki 13 tylli ki sengbhalang kiba la iakynduh ha ri Lum Garo Hills ki la shim ia ka rai ban pynlong ia ka pakhang surok miet ha ka 29, 30 bad 31 tarik mynta u bnai ka ban sdang naduh ka por 7 baje janmiet kan kut pat ha ka por 5 baje mynstep.
U Tengsak u la ong ba ka daw kaba la pynlong ia ki sengbhalang ban bteng ia ki jingiakhih ka dei halor ka jingmynthi jong ka sorkar ban pyntreikam ia ka Inner Line Permit kaba ki sengbhalang ki la dawa.
U la ong ruh ba ka jingthmu ka sorkar ban pyntreikam ia ka Tenancy Bill ka dei tang ban pynthame ia u paidbah na ka jingdawa ki sengbhalang ia ka ILP.
U la ong ruh ba ka Tenancy kan iarap ban tehlakam ia ki nongwei kan nym iarap haduh katta katta namar ka don ia kiba bun ki jingduna namar ba kane ka Bill ka thew tang ia ki nongshongwai bad kaei ka ban jia pat ia ki iing kiba ki briew kiba sah da kaba shna da ki skum bad ki iing sop plastik hato kane ka aiñ kan tehlakam ia kine ki iing kiba don khamtam ha ki khappud bad ka Bangladesh khamtam eh ha ki jaka kiba don ki par dewiong.
Une u nongialam u la ong ruh ba ia kane ka bill donkam ban iatai shuh shuh hynrei ka sorkar kam dei pat ban klet ban pyntreikam ia ka ILP kaba long ka aiñ kaba khlaiñ bha ban tehlakam ia ka jingwan rung kyrthep ki mynder ri bad ki nongwei bad u la ong ruh ba ka jylla ka la don ia ka Land Transfer Act hynrei kaei kaba jia ka long ba kane ka aiñ ka don la ki jingduna namar ba ki bar jylla ki dang lah ban pynhiar pateng ia ki jaka da kaba ioh jingbit na ki District Council.