Khot sha ka miej iakren ia ki sengbhalang, ong ki MLA barim

Shillong, 23 Risaw:
Ki MLA barim jong ka jylla Meghalaya, ki la kyntu ia ka sorkar ba kan khot iakren noh ia ki sengbhalang kiba pynlong ia ka jingiakhih ha kine ki sngi.
Ka jingialang jong ki MLA barim hapoh ka lama jong ka Meghalata Forum of Former MLAs ki la shim ia kane ka rai ha ka jingialang kaba long hynne ka sngi ha Shillong.
U president ka Forum u Bah SD Khongwir uba dei ruh u MLA barim ka Mawlai u la ong ba ki don 17 ngut ki MLA barim kiba wan ha ka jingialang hynne ka sngi.
“Hadien ba la iatai sani bha, ka jingialang ka la sngew ba ka jingiakren ka dei ka lynti ban weng noh ia kano kano ka jingbym sngewthuh jingmut”, la ong u Bah SD Khongwir.
U la ong ba ka jingialang ka sngew ba ka jingiapyni bor hapdeng ka sorkar bad ki sengbhalang ka la wanrah ia ka jingeh ia ki paidbah ka jylla . “Namar ba kan ialam sha kaba kham ma bad kham jur, ka Forum ka ai jingmut ba ka jingiakren bad ki kynhun ka long kaba dei eh ban khot kyrkieh noh”, la ong u Bah Khongwir bad bynrap ba ha ka jingialang dei ban iathir ban wad ia ki lad ki lynti kiba dei.
Lah ban kdew ba ki MLA barim ka jylla ki la khot ia ka jingialang ban iatai hadien ba ki sengbhalang ki la pynlong ia ka jingiakhih ban dawa ia ka Inner Line Permit (ILP) ha kane ka jylla.