Treikam ka pakhang shnong HNLC, shongshit tang ha 9Lad

Shillong, 22 Risaw:
Ka pakhang shnong ba 36 kynta jong ka seng lehnoh HNLC ka la kut ha kane ka janmiet ha kaba ki ophis, ki bank, ki jaka pule bad ki dukan ki iew ki hat ki la khang lut ha kine ki ar sngi kynthih. Hynrei dei tang ha Khyndai Lad ha kaba la pynlong ia ka jingiatem iaput ban pynpaw pyrshah ia ka pakhang shnong.
Kane ka pakhang shnong ba 36 kynta jong ka HNLC ka la iaid beit khlem kano kano ka jingjia ha kylleng ka ri Khasi bad Jaintia. Ka jingwan jngoh ba ar sngi jong u President ka ri u Pranab Mukhejee ka la kut mynta ka sngi, hadien ba u la pyndep ia ka jingpynkup burom ia ki samla pule ha NEHU.
Ha kine ki ar sngi, ka sor Shillong ka la kynjah jar bad la iohi ba tang ki kali sorkar light saw bad ki pulit kiba iaid sharum shaneng bad katto katne ki kali shimet.
Ka kynhun ICARE kum ka dak ban pynpaw pyrshah ia ka jingkhot pakhang shnong man ka por, ka la pynlong ia ka tamasa iatem iaput ha Khyndai Lad kaba ai kyrteng ka “Free Your Mind” ne pynlaitluit ia ka jingmut jong phi.
Ha kane ka jingiatem iaput kaba ar sngi, la wan ban sakhi ki briew na kylleng ki jaka jong ka nongbah. La pynshong shit ia ki da ki nongrwai kynthup u Bah Rana Kharkongor, Jameer Kharkongor, Cubicle bad ka Special Act na ka Shillong Chamber Choir, nalor ka jingpynshad ia ki bike ban pynbyrngia ia ki paidbah.