Ba kiew dor u piat T.90, lah ban shim piat na bar ri

NewDelhi,22 Risaw:
Ka sorkar India ka lah ban shim piat noh na bar ri namar ka jingkiew dor palat u piat ha kine ki sngi uba la kiew haduh ka T.90 tyngka shi kilo. Ka sorkar ka lah ban shim piat noh na bar ri namar ka jingkiew dor u piat, ong u Myntri ka tnad Commerce and Industry u Anand Sharma mynta ka sngi. U Myntri katei ka tnad u la kynoh ia ki hoarder halor ka jingkiew dor u piat. “Ngin shim piat noh na bar ri lada ka don ka jingtyrwa bad ka jingdonkam khnang ban lah ban pynneh ia ka dor” ong u Sharma. U Sharma u la ong pat ba ka don bun ka stock jong u piat ha ka Ri. “Ngi don ka stock kaba biang hapoh ka ri bad ka sorkar jylla ka dei ban shim jingkitkhlieh ban leh eiei ia ki hoarder namar ka jingleh jong ki ka la poi sha u pud ban kiew dor u piat” bynrap shuh shuh u Myntri ka Tnad Industry. U la pynpaw ba u don ka jingkyrmen ba kan don ka dor kaba neh jong u piat hadien ka jingwan jong ka aiom pynmih piat kaba thymmai ha u nohprah. Kumba ka long mynta ka dor u piat ka la poi haduh T.90 tyngka shi kilo katba ha kiwei pat ki bynta jong ka Ri la die T.80 tyngka shi kilo kaba long palat ar shah ban ia dor ha kine ki saw bnai ba la dep.