Pynkhuid shyngiar ha Mawdatbaki

Shillong, 22 Risaw:
Ki dkhot jong ka Seng Samla Mawdatbaki ki la mih shrup ha ka 11 tarik Risaw ban pynkhuid ia ka shyngiar bad ka nala ba tuid sha Umsohlang PHE Water Supply. Ryngkat ka wait u mohkhiew, proh bad ka khoh ki la pynkhuid ia katei ka shyngiar kum shi bynta ban pynsngewthuh ia ki paidbah ka shnong ban nang ban leh khuid.Kane ka shyngiar ka dei kawei na ki pung umdih kaba don ha ka shnong Mawdadbaki bad kaba bsa um baroh saw aiom ia u paidbah ka shnong Mawdadbaki bad ki shnong ba marjan.
Shwa ban pynlong ia ka jingpynkhuid, la pynlong ia ka jingialang lyngkot da u social secretary u samla Rap Kharbuli ba la don lang u rangbah shnong bad secretary kiba la ai jingiaroh ia kane ka lynti ba ka seng ka shim.
Ka seng ka ai khublei ia kiba wan ban iadon bynta ban pynkhuid bad ruh ia u MLA Bah Embhah Syiemlieh ba noh synniang sha ka seng. Kane ka long ka kyrwoh na u samla Kenny Mukhim u secretary ka seng.